சித்திரக்கதை

புத்தக கண்காட்சி இரண்டாவது சுற்று - 2012

2012-01-21T08:50:00.003+05:30

புத்தக கண்காட்சியின் இறுதி நாளன்று சேகரித்த புத்தகங்கள். இதில் நேரடி காமிக்ஸ் என்று பார்த்தால் காமிக்ஸ் கிளாஸிக் மட்டுமே.

மாற்றுவெளி - சித்திரக்கதை சிறப்பிதழ்:

நண்பர்கள் தமிழ் காமிக்ஸ் பற்றி ஆய்விதழான இவ்வெளியீடைப் பற்றி ஏற்கனவே கேள்விப்பட்டிருக்க கூடும். விஜயன், மருது, ஜெ, மணியம் செல்வன் என்று பல காமிக்ஸ் ஆர்வலர்களின் பேட்டியும் பல இணைய நண்பர்களின் கட்டுரைகளும் இடம்பெற்றுள்ள இந்த இதழ் ஒவ்வொரு காமிக்ஸ் ஆர்வலரின் கைகளிலும் இருக்க வேண்டிய முக்கியமான புத்தகமாகும். விஜயன் சாரின் மிக விரிவான நேர்காணல் இவ்விதழின் மிக முக்கியமான அங்கம். நிறைய தகவல்கள் புதைந்துள்ள இந்த நேர்காணலை யாரும் மிஸ் செய்திட வேண்டாம்.

கண்காட்சியில் இதழை மிஸ் செய்தோர்க்காக.....

வானதி பதிப்பகம்:

சென்றமுறை வானதியில் மிஸ் செய்திட்ட 'எதிர்நீச்சல்' இதழை இந்த முறை வாங்கியாகிவிட்டது. விசாகன் என்பது வாண்டுமாமாவின் இன்னொரு புனைப்பெயர் என்ற விஸ்வாவின் தகவல் மூலம் இன்னும் இரண்டு புத்தகங்கள் என் வாண்டுமாமா சேகரிப்பில் சேர்ந்து கொண்டன. வாண்டுமாமா தனது மனைவி பெயரில் (அல்லது அவரது மனைவியே) எழுதிய வயலின் வசந்தாவும் வாண்டுமாமா சேகரிப்பில் சேர்ந்து கொண்டது.

வயலின் வசந்தா

மாஜிக் மாலினி

மாயாவி இளவரசன்

உலகம் சுற்றும் குழந்தைகள்

எதிர்நீச்சல்

திராவிட நாட்டுக் கதைகள்:

பிரேமா பிரசுரத்தின் 'விக்கிரமாதித்தன் கதைகள்' இதழை இன்னும் படிக்கவில்லை. ஆனாலும் புரட்டி பார்த்த பாதிப்பில் வாங்கிய புத்தகம் இது. இவ்விதழும் 500 பக்கங்களுக்கு மேல். ஆனால் விலை ரு100/- மட்டும் தான்.

இறுதியாக....

- நன்றி-

புத்தக கண்காட்சியில் காமிக்ஸ் சேகரிப்பு - 2012

2012-01-10T07:20:00.001+05:30

அனைவருக்கும் புத்தாண்டு மற்றும் பொங்கல் நல் வாழ்த்துக்கள். நீண்ட நாட்களுக்குப் பிறகு ஒரு பதிவு. புத்தக கண்காட்சியும், என் மனதெங்கும் நிறைந்திருக்கும் 'லயன் கம் பேக் ஸ்பெஷல்"ம் இந்த பதிவை எழுத தூண்டி விட்டது. 6/01 மற்றும் 07/01 ஆகிய இரு நாட்கள் புத்தக கண்காட்சி சென்றிருந்தேன். புத்தக கண்காட்சி மீதான காமிக்ஸ் தொடர்பான எனது பார்வையே இந்தப் பதிவு. முதல் நாள் உள்ளே நுழைந்த உடன் விறு விறு வென லயன் ஸ்டால்க்குச் சென்றேன். கைவசம் இல்லாத சில காமிக்ஸ் கிளாஸிக்குகளையும் லயன் கம் பேக் ஸ்பெஷலையும் எதிர்பார்த்து உள்ளே நுழைந்த எனக்கு ஏமாற்றமே. அங்கே விஸ்வா மற்றும் ரகு இருவரையும் சந்தித்தது மகிழ்ச்சியாய் இருந்தது. நான் வாங்கிய காமிக்ஸ் தொடர்பான புத்தகங்கள்.

1. லயன் கம் பேக் ஸ்பெஷல்:

இந்த இதழை பார்த்த உடன் தமிழ் காமிக்ஸ் புதியதோர் பரிணாமத்திற்குள் நுழைந்திருப்பதாகவே எனக்குப்பட்டது. வாழ்த்துக்கள் விஜயன் சார்.

மாயாவி கதைகள் : இப்போதைக்கு மாயாவியின் 'டாக்டர் மாக்ணோ' மட்டும் படித்துள்ளேன். களிமண் மனிதர்கள் போன்ற கதைகளை படித்து மாயாவி மேல் ஈடுபாடு இல்லாத நிலையில் இந்த கதை ஒரு

surprise piece. பரபப்பான கதை, சிறப்பான மொழிபெயர்ப்பு என எனக்கு மிகவும் பிடித்து இருந்தது. மாயாவி கதைகளை இனிமேல் வெளியிடுவதென்றால் இது போன்ற கதைளையே தேர்வு செய்தால் நலம். அந்த சூப்ப்பர் மேன் மாயாவி வேண்டாமே please.

லக்கி லூக் மற்றும் பிரின்ஸ் கதைகள்: இன்னும் படிக்கவில்லை. தூள் கிளப்பும் வண்ணம், பளபளப்பான காகிதம் புது புத்தக வாசனை. இவற்றில் இருந்தே தெரிகிறது இந்த கதைகள் ஒரு சிறப்பான வாசிப்பு அனுபவதை கொடுக்கப் போகிறது என்று.

காரிகன் சாகஸம்: வழக்கமான ஒரு குறைகள் இல்லாத காரிகன் சாகஸம்.

வரவிருக்கும் விளம்பரங்கள்: லக்கி, பிரின்ஸ், ஜானி, டெக்ஸ், காரிகன், ஜார்ஜ் என ஒரு பெரிய லிஸ்டே உள்ளது. இவை அனைத்தும் இந்த வருடத்தில் வெளிவரும் பட்சத்தில், 2012 ஒரு அருமையான வருடமாக இருக்கப்போவது உறுதி. அடுத்த எதிர்பார்ப்பு சூப்பர் ஹீரோ ஸ்பெஷ்ல் மீது விழுந்துள்ளதது. ( ஆனால் ஸ்பைடர், ஆர்ச்சி இவர்கள் அடிக்கடி வேண்டாம் என்பது என் கருத்து). என் அபிமான டைகர், ராபின் ஆகியோரரையும் பார்க்க ஆவலுடன் உள்ளேன்.

காமிக்ஸ் கிளாஸிக்கில் ஏற்கனவே கொலைகாரக் கலைஞன் வந்து விட்டது என்று நினைக்கிறேன்??.

விற்பனை முறை:

புத்தக கண்காட்சியில் அறிமுகம் செய்தது சிறப்பான ஐடியா. ஆனால் கம் பேக் ஸ்பெஷல் பற்றி இணைய தொடர்பு இல்லாத மற்றும் புத்தக கண்காட்சிக்கு வராத வாசகர்கள் எப்படி தெரிந்து கொள்வார்கள் என்ற கேள்வி எழுகிறது.

அடுத்து வெளிவர இருக்கும் இதழ்கள் கடைகளில் கிடைக்குமா? கிடைக்காது எனில் முன்பதிவு செய்வதற்கான கூப்பன் ஏதும் இந்த இதழில் இல்லை. ஆசிரியர் இதை சற்று விளக்க வேண்டும்.

அட்டைப்படம்:

என்னை பொருத்த வரை லயன் கம் பேக் இதழின் ஒரே ஏமாற்றம் இந்த அட்டைப்பட டிசைன் தான். கதைகளில் உள்ள வண்ணப்படங்களை அப்படியே zoom செய்தது போல் உள்ளது. வழக்கமான பெயிண்டிங் வகை ஓவியம் இல்லாத அட்டைப்படம் ஏனோ மனதில் ஒட்டவில்லை.

கம் பேக் ஸ்பெஷல் வெளியீட்டு நிகழ்ச்சி: விஜயன் சார் புத்தக கண்காட்சிக்கு வந்து இருந்ததையும் எள்ளிமையான ஒரு வெளியீட்டு நிகழ்ச்சி நடைபெற்றதையும் பிறகு தான் தெரிந்துகொண்டேன். விஜயன் சாரை சந்திக்கும் வாய்ப்பினை இழந்தற்கு பெரிதும் வருந்ந்துகிறேன்.

2. சித்திரக்கதைகள் @ "யுரேகா புக்ஸ்" (ஸ்டால் 367)

இந்த ஸ்டாலில் குழந்தைகளுக்கான நிறைய சிறிய சிறிய புத்தகங்களை வைத்துள்ளனர். அவற்றில் எண் கண்ணில் பட்ட சித்திரக்க்தைகளை நூல்கள். இந்த இதழ்கள் கண்ணிப்பாக சிறுவர்களுக்கு மட்டுமே. Twinkel இதழ்களில் இடம்பெறும் தரத்துடன் இந்த கதைகள் மற்றும் சித்திரங்கள் உள்ளன. இதழின் தயாரிப்புத்தரம் அருமை. பில் போடும் போதுதான் விலையை கவனித்தேன். 16 பக்கங்களுக்கு 30ரூபாய் ரொம்ப அதிகம். இந்த ஸ்டாலில் வேறு சித்திரக்க்தைகள் இருக்கவும் வாய்பு உண்டு

3. சித்திரக்கதைகள் @ நியு சென்சுரி புக் ஹவுஸ்

பழைய பதிப்பு

சிறிய வயதில் படித்த ரஷ்யாவின் ராதுகோ பதிப்பகத்தின் சித்திரக்கதைகளை மறுபதிப்பு செய்துள்ளனர். வேறு ஒரு அட்டைப்படத்துடன் சற்று சிறிய வடிவில் இந்த முறை நியு சென்சுரி புக் ஹவுஸ் பதிப்பகம் மூலம் வெளியிடப்பட்டு உள்ளது. விலை ரூ 60/. அருமையான ஓவியங்கள் மற்றும் சிறு சிறு கதைகள் என காமிக்ஸ் ஆர்வலர்கள் மிஸ் செய்திடக்கூடாத ஒன்று. ஏற்கனவே பழைய பதிப்பு கைவசம் உள்ளதால் இப்ப்போது நான் வாங்கவில்லை. ஏற்கனவே நமக்கு அறிமுகமான ரஷ்ய புரட்சி இன்னும் இங்கு ஸ்டாக்கில் உள்ளது.

4. சே வாழ்க்கை வரலாறு மற்றும் அமெரிக்க பேரரசின் மக்கள் வரலாறு: (புதிய உலகம் - ஸ்டால் 29)

சென்ற வருடம் விஸ்வா அறிமுகம் செய்திட்ட இந்த இதழ்களை இந்த வருடம் வாங்கியாகிவிட்டது. ஸ்டாலின் உள்ளே சென்ற உடனே இந்த புத்தகங்களை எடுத்து வந்து பில் கவுண்டரில் கொடுக்கவும் மிகுந்த ஆச்சிரியத்திற்குள்ளானார் விற்பனையாளர். இந்த வருடத்தின் costly purchase இது தான் என்று நினைக்கிறேன். இதே இதழ்களை வேறு ஒரு பதிப்பகத்திலும் பார்த்தேன்.

விஸ்வாவின் சென்ற வருட புத்தக கண்காட்சி பதிவில் இருக்கும் அனைத்து காமிக்ஸ்களும் இன்னும் இருக்கிறது என்றே எண்ணுகிறேன். இப்போதைக்கு என் கண்ணில் பட்ட இதர காமிக்ஸ்கள் மட்டும் இங்கே.

1. ஈரான் (1&2 பாகங்கள்) - விடியல் பதிப்பகம்
2. தாராவும் குகை மனிதர்களும் - மணிமேகலை
3. சில சுட்டி காமிக்ஸ்கள் - விகடன் பிரசுரம்
4. ரஷ்யப் புரட்சி - நியு சென்சுரி புக் ஹவுஸ்
5. புராண சித்திரக்கதைகள் - அமுத நிலையம் (ஸ்டால் 235)
6. கதை மலர்
7. தமிழ் அமர் சித்திரக்கதைகள் - கிழக்குப் பதிப்பகம்.
8. பலே பாலு - வானதி பதிப்பகம்.

காமிக்ஸ் அல்லாது வாங்கிய சில சிறுவர் இலக்கிய புத்தகங்கள்:

1. வாண்டுமாமாவின் அன்றிலிருந்து இன்று வரை: (வானதி)

நுணுக்கமான அறிவியல் மற்றும் வரலாற்று கட்டுரைகளை கூட வாண்டுமாமா எல்லாருக்கும் புரியும் விதம் எழுதுவதில் வல்லவர். குழந்தைகளுக்கு என அவர் வழங்கிய பல அறிவியல் புத்தகங்கள் பெரியவர்களுக்கும் மிக்க பயன் உள்ளதாக இருக்கிறது. செல்லம் அவர்களின் ஓவியங்களுடன் கூடிய இந்த புத்தகம் என் 'பொது அறிவை' வளர்ப்பதற்காக. வானதியில் இது போல வாண்டுமாமாவின் பல பொது அறிவு புத்தகங்கள் உள்ளன. இவற்றை படித்தால் நீங்கள் கதைசொல்லி என்ற பிம்பத்தை தாண்டிய ஒரு வாண்டுமாமாவினைக் காணலாம். விஸ்வா ஒரு முறை வாண்டுமாமா அவர்களை சுஜாதாவுடன் ஒப்பிட்டு எழுதியதை இங்கு நினைவு கூர்கிறேன்

2. வாண்டுமாமாவின் மர்ம மனிதன்: (வானதி)

சென்ற வருடம் மிஸ் செய்திட்ட ஒரு இதழ். இந்த வருடம் வாங்கியாகிவிட்டது

3. விக்கிரமாதித்தன் கதைகள்: (பிரேமா பிரசுரம்)

விக்கிரமாதித்தன் கதைகள் ஏற்கனவே பல விதங்களில் அறிமுகம் ஆகியிருந்தாலும் ஓவியங்களுடன் கூடிய இந்த இதழ் வித்தியாசமான மொழிநடையில் புதுவித அனுபவத்தை கொடுக்க போகிறது என்று எண்ணுகிறேன். 600 பக்க இதழ் ருபாய் 90 மட்டுமே. இதே இதழ் பெரிய எழுத்துக்களுடன் கடின அட்டை பைடிங் உடனும் கிடைக்கிறது.

4. நல்லதங்காள் கதை:

ஒரு முழுமையான நல்லதங்காள் கதை பற்றிய புத்தகத்தை நீண்ட நாட்களாக தேடிக்கொண்டிருந்த எனக்கு மணிமேகலை பிரசுரத்தின் இந்த கதைச் சுருக்கமே கிடைத்தது.

பதிவை படித்துவிட்டு கருத்துகளை பகிர்ந்து கொள்ளுங்கள் நண்பர்களே..

சூர்யா காமிக்ஸ்

2011-10-04T22:38:00.000+05:30

சிறுவர்களுக்கான பல நூலகளை எழுதியவர் பஞ்சுமாமா (தேவக்கோட்டை பஞ்சுநாதன்). சிறுவர்களுக்கான நீதிக்கதைகள், தெனாலிராமன் கதைகள் மாதிரியான நூல்களை இவர் வழங்கியிருக்கிறார். புத்தகப்பூங்கா பதிப்பகம் மூலம் இவரின் புத்தகங்களை நீங்கள் பார்த்திருக்க கூடும். 1990களில் இவர் வெளியிட்ட சித்திரக்கதை இதழ் தான் சூர்யா காமிக்ஸ். இந்த காமிக்ஸின் 3வது (என்று நினைக்கிறேன்) இதழான 'பனிமலையில் தம்பித்துரை' பற்றி கொஞ்சமாக இந்த பதிவில் பார்க்கலாம்.

அட்டைப்படம்

ஆசிரியர் பகுதி

கதையின் சில பக்கங்கள்

வாசகர் கடிதம்

புத்தகப் பூங்கா விளம்பரம்

வழக்கம் போல கதை எழுதியவர் பெயர் மற்றும் சித்திரங்களின் சொந்தக்காரர் பற்றிய தகவல் ஏதும் இல்லை.

கதை - இமயமலை ஏறும் குழுவினர் காணாமல் போக, நாட்டில் உள்ள அனைவரும் மண்டையை பிச்சு கொண்டிருக்க, நம் கதையின் நாயகன் தம்பித்துரை தமிழ்நாட்டில் இருந்து இமயமலை கிளம்புகிறான். மலை ஏறும் குழுவினர் ஏன் காணாமல் போயினர் எங்கு இருக்கின்றனர் போன்ற அனைத்து விபரங்களையும் தம்பித்துரை கண்டு பிடிக்கிறான்.

தெளிவான கதையோட்டம், அதற்கேற்ற வசனங்கள், ஓரளவு தரமான சித்திரங்கள் என இந்த இதழ் சராசரியான தமிழ் சித்திரக்கதைகளின் தரத்தை விட சற்று சிறப்பாகவே உள்ளது. முந்தைய இதழான சிங்கபுரி ரகசியம் இதழ் இல்லை என்றாலும் படித்த ஞாபகம் லேசாக உள்ளது. அதுவும் தம்பித்துரை சாகஸம் தான். சுவாரிஸ்யமான கதை என்றே என் ஞாபகம் உள்ளது

மொத்தம் எத்தனை இதழ்கள் வந்தது என்பது பற்றி தெளிவான கருத்து இல்லை. 4 - 5 இதழ்கள் வந்திருக்க கூடும் என்பது என் எண்ணம். நண்பர்கள் தங்களின் கருத்துகளை பகிர்ந்து கொள்ள வேண்டுகிறேன்

தொந்தி பூதமும் மந்திர நாயும் (Tamil children magazines)

2011-06-19T07:52:00.001+05:30

உங்கள் அப்பா சிறுவயதில் படித்திட்ட சிறுவர்கள் இதழ்களை நீங்கள் பார்த்திருக்க கூடும். ஆனால் நமது தாத்தா காலத்தில் அதாவது சுதந்திர அடையும் முன்பும் அதன் பிறகு சிறிது காலங்களிலும் சிறுவர் இதழ்கள் எப்படி இருந்தன?? அதை தெரிந்து கொள்ள உங்களுக்கு இந்த பதிவு உதவக்கூடும். இணையத்தில் தமிழம் ம.நடேசன் அவர்கள் ஆவணப்படுத்தி உள்ள தமிழ் பத்திரிக்கைகள் பற்றிய குறிப்புகளில் இருந்து ஒரு சில துளிகள் இங்கே....

தமிழம் ம.நடேசன் - ஒரு அறிமுகம்:

பொள்ளாச்சி நசன் என்று அழைக்கப்படும் திரு ம.நடேசன் அவர்கள் நடத்திடும் தமிழம் எனும் இணையப்பக்கத்தில் வெகு காலத்திற்கு முன்பு வந்த தமிழ் மாத, வார பத்திரிக்கைகள் பற்றிய தகவல்கள் குவிந்து கிடக்கின்றன. நம் அப்பா, தாத்தா காலங்களில் பத்திரிக்கை உலகம் எப்படி இருந்ததென்பதை அறிய தமிழம் பக்கத்திற்கு ஒரு விசிட் அடித்துவிட்டு வரவும். இவருடை பத்திரிக்கைகளின் ஆவணப்படுத்தும் முயற்சிக்கு வாழ்த்துக்கள். தமிழம் பக்கத்தில் இருக்கும் சில சிறுவர் பத்திரிக்கைகளின் அட்டைபடமும் தகவல்களும் உங்கள் பார்வைக்கு. இதற்கு பிறகு இந்த பதிவில் வரும் தகவல்களும் படங்களும் தமிழம் இணையத்தில் இருந்து எடுக்கப்பட்டவை.

சித்திரக்குள்ளன் (1932)

சித்திரக்குள்ளன் : ஆசிரியர் - கேலிச்சித்திரக் கலைஞர் சந்தனு. சிறுவர் இதழ். இரண்டாம் ஆண்டின் முதல் இதழ் இது. சிறுவர்களை ஈர்க்கும் வகையில் அங்கு எழுதிய மலைவீடு தொடர்கதை, காட்டுச் சிறுவன் கண்ணன், வேதாள உலகத்தில் என்கிற கேலிச்சித்திரத் தொடர்கதை, குள்ள மாமாவைக் கேளுங்கள் என்கிற வினாவிடைப் பகுதி, அறிவுப் போட்டிகள் எனச் சிறுவர்கள் வாங்கிப் படித்து மகிழ்வதற்குரியதாக சித்திரக்குள்ளன் சிறுவர் இதழ் வந்துள்ளது. வென்றாலும் தோற்றாலும் பரிசு உண்டு எனச் சிறுவர்களை ஊக்குவித்து எழுதவைத்து, பெயரை அச்சாக்கி மாணவர்களை வளர்த்து வந்தன அன்றைய சிறுவர் இதழ்கள். எழுதிப் பரிசு பெறாதவர்கள் அனைவருக்கும் குத்துச் சண்டை குப்பசாமி சிறுகதை நூல் ஒன்று (விலை 4 அணா) இனாமாக அனுப்பப் படும் என்று குறிப்பிட்டுள்ளது.

பாப்பா :

பாப்பா சிறுவர் இதழ். சூன் 46 ல் சென்னையிலிருந்து வெளியான இந்த இதழ் 4 ஆம் ஆண்டின் 5 ஆவது இதழ். சிறுவர்களுக்கான பாடல்கள், கதைகள், செய்தித் தொகுப்புகள் அலமுவின் அதிசய உலகம் போன்ற படைப்புகள் வெளியாகியுள்ளன. கண்ணை நம்பாதே என உளவியல் விளக்கப் படங்களையும் வெளியிட்டுள்ளது. விளம்பரத்தைக்கூட சுவையான ஈர்ப்புடைய செய்தியாக ஒருபக்க அளவில் வெளியிட்டுள்ளது. ருக்மணி எழுதியுள்ள சவாரி குதிரை மாணவர்களின் நெஞ்சை விட்டகலாதது.

டமாரம்:

1948 இல் சிறுவர் இதழ்கள் தரமாக வெளிவந்தன. பாலர் மலர் ஏழரை ஆண்டுகளும், சஙகு மூன்று ஆண்டுகளும், டமாரம் 5 ஆண்டுகளும் வெளிவந்தன. சங்கு 3 பைசா, டமாரம் 6 பைசா அதாவது அரையணா. இவ்வகை இதழ்கள் சிறுவர்களுக்கு ஆர்வமூட்டி, படிக்கும் பழக்கத்தை வளர்தெடுத்தன. நம் தொகுப்பில் டமாரம் 1- டம் டம் 43 முதல் டமாரம் 2- டம்டம் 20 வரை உள்ளன.

சந்திர ஒளி :

சந்திர ஒளி - சிறுவர் இதழ். ஆசிரியர் : சாமி. 1949 இல் இரண்டணா விலையில் சிறுவர்களுக்காக வெளிவந்த மாதமிருமுறை இதழ். சென்னை 7 லிருந்து தமிழ்நாட்டுத் தம்பி தங்கைகளின் நல்லொழுக்கத்தை வளர்க்கத் திட்டமிட்டு வெளிவந்த இதழ். 20-10-49 இல் வெளிவந்த 8 ஆவது இதழ் இது. சிறுகதை, கவிதை, தொடர்கதை, கேள்வி பதில், குறிப்பு, பொன்மொழிகள், போட்டிகள் என சிறுவர்களை ஈர்க்கும் வகையில் வெளியிட்டுள்ளது. கசகசா எழுதிய தங்கச் சுரங்கம் தொடர்கதை வியப்பூட்டும் வகையில் தொடர்ந்துள்ளது.

பாலர் மலர்:

பாலர் மலர் - சிறுவர் இதழ் : ஆசிரியர். வ்.எஸ். நடேசன்., 1949 இல் புதுக்கோட்டையிலிருந்து வெளிவந்த சிறுவர் இதழ். இந்த இதழ் ஆறாவது ஆண்டின் 11ஆவது இதழ். பாலர் மேடை, பேனா நண்பர்கள் சிறுவர்களுக்கான சிறப்பான தொடர். இதழிலுள்ள சிறுகதைகள் சுவையாக உள்ளன.

தம்பீ:

சிறுவர்களுக்கான வாரஇதழ். 1949 செப்டம்பர் 12 இல் வெளியான இதழ். பதிவு பெற்ற இதழ். விலை ஒரு அணா. மணி ஆசிரியராக இருந்து புதுக்கோட்டையிலிருந்து வெளியிடப்பட்ட இதழ். 16 பக்கங்களில் சிறுவர்களை ஈர்க்கும் வகையில் வெளியிட்டுள்ளது. கதைப்போட்டிகள் நடத்தி பரிசளித்துள்ளது. வளரும் கதை என தொடர்கதை வெளியிட்டுள்ளது. இந்த இதழில் இவர் யார் என பிரெஞ்சு தேசத்து எஞ்சினியரை அறிமுகப்படுத்தியுள்ளது. செய்துபார் என குண்டூசியைத் தண்ணீரில் மிதக்க வைத்தல் பற்றிய குறிப்பை வெளியிட்டுள்ளது. பாரதி நாள் பற்றியும், பெரிய மருது சின்ன மருது பற்றியும் குறிப்புகளை வெளியிட்டுள்ளது. மாய சைக்கிள் சிறுகதை சுவையுடையதே.

மான் :

சிறுவர்களுக்கான இதழ். இதழ் பெயர் : மான் 1949 களில் சென்னையிலிருந்து கலைவாணன் வெளியிட்ட இதழ். எட்டு பக்கங்களில் காலணா விலையில் வெளிவந்த வார இதழ். சிறுவர்களுக்கான போட்டி நடத்திப் பரிசளித்துள்ளது. தொடர் கதை, குட்டிக் கதை, அறிவியல் குறிப்பு, மானைக் கேளுங்கள் என வினா விடை பகுதி, எனத் தரமாக வெளிவந்துள்ளது. போட்டிக்கான பரிசு ரூ 10 அளித்துள்ளது.

பாபுஜி:

சிறுவர்களுக்கான சிறந்த மாதப்பத்திரிகை. இதழ் பெயர் : பாபுஜி ., ஆசிரியர் - சதாசிவம். 1949 களில் சென்னையிலிருந்து வெளிவந்த இதழ். தம்பி தங்கைகளே என அழைத்து சிறுவர்களுக்கான பல்வேறு செய்திகளைத் தருகிற இதழ். சிறுவர் நாடகம், இசையோடு பாடுவதற்குரிய பாடல்கள், தொடர்கதை, வேடிக்கைக் கணக்குகள், ஈர்ப்புடைய சிறுகதைகள் என வெளியிட்டுள்ளது. பாபுஜி சிறுவர் சங்கம் என விண்ணப்பம் வெளியிட்டு சிறுவர்களை இணைத்து, சங்கத்தின் வழி படைப்பாளர்களை உருவாக்கியுள்ளது.

ஜிங்லி (1951)

ஜிங்லி : சென்னை சிந்தாதிரிப் பேட்டையிலிருந்து வெளிவந்த குழந்தைகளுக்கான வார இதழ். தனியிதழ் 2 அணா. இந்த இதழ் 10-1-1951 இல் வெளியான முதலாம் ஆண்டின் 22 ஆவது இதழ். இந்த இதழில் தமிழேந்தி எழுதிய மகுடபதி, சூடாமணி எழுதிய அபாய மனிதன் கதையும் வெளியாகியுள்ளது. கோழை, தூக்க மாத்திரை, பிசாசுப் பெண் சிறுவர் கதையும் வந்துள்ளது. ஒவ்வொரு மாதமும் போட்டி வைத்து பரிசளித்துள்ளது.

கோமாளி (1952)

கோமாளி : 1952 ஆம் வருடம் சென்னையிலிருந்து திருநாவுக்கரசு அவர்கள் வெளியிட்ட சிறுவர் இதழ். இதழில் ராஜன் எழுதிய மர்ம மாளிகை என்கிற சிறுவர் தொடர் ஈர்ப்புடையதாக உள்ளது. துணுக்குச் செய்திகள் சுவையூட்டுவதாகவும், அறிவூட்டுவதாகவும் உள்ளன. நாவுக்கரசரைக் கேளுங்கள் என ஆசிரியரின் கேள்வி பதிலும் உள்ளன. சிறுவர்களுக்கான ஒரு பக்கச் சிறுகதைகளும் உள்ளன.

மிட்டாய் (1952)

மிட்டாய் : சிறுவர் இதழ் 1952 இல் திருநாவுக்கரசு அவர்கள் ஆசிரியராக இருந்து வெளியிட்ட இதழ். இது முதலாண்டின் 12 ஆவது இதழ். விலை 2 அணா. சிறுவர்கள் வீரச்செயல் புரிவதற்கான கதைகள், மந்திரக் கதைகள் வெளியிட்டுள்ளது. சிறுவர்கள் கேட்கிற வினாவிற்கான விடைகளைச் சுடச்சுட எனத் தந்துள்ளது. கதம்பம் எனப் பல்சுவைக் குறிப்புகளை குறிப்பிட்டுள்ளது. நகைச் சுவைகளையும் வெளியிட்டுள்ளது

சாக்லெட் (1952)

அல்வா (1954)

அல்வா - சிறுவர் இதழ் - வார இதழ் - ஆசிரியர் அருள்வாணன், 9, இப்ராகிம் சாயபு தெரு, சென்னை 1. 1954 மே மாதம் தொடங்கப்பட்ட இதழ். விலை அரையணா. ஆசிரியர் எழுதியுள்ள வீரன் விஜயவர்மன் அட்டைப்படக்கதை, ஹென்றி போர்டு பற்றிய குறிப்பு, மா.சா.கம்பதாசன் எழுதியுள்ள அறஞ்செய்ய விரும்பு, வெ.கைலாசம் எழுதிய சிறுகதை, டைரிக் குறிப்பு என சிறுவர்களை ஈர்க்கும் வகையில் இதழ் வெளியாகியுள்ளது.

கரும்பு (1956)

கரும்பு (சிறுவர் இதழ்) - 1956 நவம்பர் திங்களில் வெளிவந்த இந்த இதழ் மூன்றாவது ஆண்டின் 13 ஆவது இதழ். இந்த இதழ் சிறுவருக்காக சென்னையிலிருந்து வெளிவந்த சிறுவர் வார இதழ். ஆசிரியர் சங்கு கணேசன். இந்த இதழில் தஞ்சாவூர் அ.பிச்சை, சென்னை டி.பி.சீத்தராமன் என்கிற இரண்டு குழந்தை எழுத்தாளரின் படங்களைப் பிரசுரித்துள்ளது. புயலின் புன்னகை என்ற கோட்டோவியத் தொடர்கதையை வெளியிட்டுள்ளது. குழந்தை இலக்கியத்திற்குப் பரிசு என்று அழ.வள்ளியப்பா எழுதிய மலரும் உள்ளம் நூலுக்கு மத்திய அரசு ரூபாய் 500 பரிசளித்துள்ளதைக் குறிப்பிட்டுள்ளது. - இந்த நூலில் 2000 பிரதிகளை வாங்கி பள்ளிக்கூட நூலகங்களுக்கு அன்பாளிப்பாகத் தருவார்கள் என்ற செய்தியையும் குறிப்பிட்டுள்ளது.

கண்ணன்

கண்ணன் : ஆசிரியர் - ந.இராமரத்நம். ஒன்பதாவது ஆண்டின் மூன்றாவது இதழ் இது. சென்னை 4, கலைமகள் காரியாலயம் வெளியீடாக வெளிவந்த சிறுவர்களுக்கான மாத இதழ். சிறுகதை, பரிசுபெற்ற தொடர் கதை, மூளைக்கு வேளை, கடற்புலி படத்தொடர்கதை, பேனா நண்பர்கள் பட்டியல் என சிறுவர்களை ஈர்க்கும் வகையில் சிறப்பாக நடைபெற்றுள்ளது. கண்ணன் சிறுவர் இதழ் வழியாகக் கிளைக் கழகங்களை ஏற்படுத்தி, உறுப்பினர்களைச் சேர்த்து, ஊக்கப்படுத்தி மாணவர்களின் பல்முனை ஆற்றலை வளர்த்தெடுத்துள்ளது. கண்ணன் வெளியீடுகள் என ராஜி, ஆர்.வி.ஸாமி, ஜி.ஜயராமன், பெ.தூரன், கி.வா.ஜ, தி.ஜ.ர, சோமசன்மா, சூடாமணி போன்ற எழுத்தாளர்களின் சிறுவர்களுக்கான கதைகளை நூலாக வெளியிட்டுள்ளது.

கண்ணன். 1960 பிப்ரவரி மாதம் வந்த சிறுவர் இதழ் இது. இந்த இதழ் 11 ஆம் ஆண்டின் 4 ஆவது இதழ். கண்ணன் இதழ் மாதம் இருமுறை இதழாக வெளிவந்துள்ளது. சிறுவர்களுக்கான தரமான இதழாக மலர்ந்துள்ளது. விலை 15 ந.பை. (ஒரு ரூபாய்க்கு 100 பைசா) அகர முதல எழுத்தெல்லாம் ஆதிபகவன் முதற்றே உலகு என்கிற திருக்குறளைத் தலைப்பில் எழுதியுள்ளது. மயிலிறகு தலையில் உள்ள கண்ணன் வெண்ணைப் பானையில் வெண்ணை எடுப்பது போன்ற படமும் உள்ளது. இதழில் சிறுவர் கதை எழுதுகிற படைப்பாளிகளை அறிமுகம் செய்து வந்துள்ளது. இந்த இதழில் வி.ராஜாமணி, பெங்களூர் அறிமுகமாகியுள்ளார். மருதூர் மாளிகை படக்கதை இதழில் உள்ளது. ஆர்.வி. எழுதியுள்ள புதிய முகம் கதை சிறுவர்களை ஈர்ப்பதே. எ.ந.கணபதியின் லட்சியக்கனவு கவிதை இசைக்கக்கூடியதே. கொதிகலன்கள் பற்றி ரகு எழுதியுள்ள அறிவியல் கட்டுரை சிறப்பாக உள்ளது. மன்னர் மன்னன் நாடகம் சுவையானதே. படமும் செய்தியும் குறிப்பு பின் உள்அட்டையில் உள்ளது. இதழாசிரியர் ஆர்.வெங்கடராமன் சென்னையிலிருந்து இதழை வெளியிட்டுள்ளார்.

ஆராய்ச்சிமணி

சிறுவர்களுககான ஆராய்ச்சி மணி. மதுரையிலிருந்து அரையணா விலையில் வெளிவந்த குழந்தைகளுக்கான இதழ். இது முதல் இதழ். பதிப்பாசிரியர் மூர்த்தி. வெளியீட்டுத் தேதி குறிப்பிடப்படவில்லை. சிகப்பு பச்சை வண்ணத்தில் 8 பக்கத்தில் வெளியாகியுள்ள இதழ். காட்டில் ஸ்டிரைக், சோகக்குரல் என இரு கதைகளும், காக்கைக்குக் கண்சாய்ந்த வரலாறு, தேயிலை என இரண்டு குறிப்புகளும், வெளியாகியுள்ளன. கலைநேசன் என்கிற மாதமிருமுறை இதழ் பற்றிய குறிப்பும் இந்த இதழில காணப்படுகிறது

அணில் மாமா

அணில் மாமா - 1978 இல் சென்னையிலிருந்து வெளிவந்த சிறுவர் இதழ். ஆசிரியர் புவிவேந்தன். இதழில் சித்தன் கேலிப்படம் வரைய ஆசிரியரின் கில்லாடி கிரி படக்கதை பின் அட்டையில் சிறப்பாக வந்துள்ளது. நடுப்பக்கத்தில் அணில் அண்ணா எழுதிய மந்திரவாதியும் மூன்று குள்ளர்களும் படக்கதை வெளியாகியுள்ளது. அணில் அண்ணா எழுதியுள்ள தொந்தி பூதமும் மந்திர நாயும் கதை இந்த இதழில் உள்ளது. சிறுவர்களுக்கான தொடர்கதை, ஒரு பக்கக் கதை எனச் சுவையாகத் தந்துள்ளது. சிறுவர்கள் கேட்கிற வினாவிற்கான பதிலும். குறுக்கெழுத்துப் போட்டியும். ஈர்ப்புடைய குறிப்புகளும் இதழில் வெளியிட்டுள்ளது.

அந்தக்கால சிறுவர் இதழ்களை நன்றாக ரசித்தீர்களா நண்பர்களே...

*அந்த கால அட்டைப்படங்கள் இரு வண்ணங்களில் அருமையாக உள்ளன.

* சிறுவர்களிடம் தேச பக்தியையும் ஒழுக்கத்தையும் வளர்க்கும் விதமாக பல பத்திரிக்கைகள் வடிவமைக்கப்பட்டு உள்ளது தெரிகிறது.

* ஆசிரியர் கூற்றுப் படி 1932ல் வெளிவந்த சித்திரக்குள்ளன் இதழில் சித்திரக்கதைகள் இடம் பெற்று இருந்திருக்கிறது. இது தான் தமிழின் முதல் சித்திரக்கதையாக கூட இருக்கலாம். எப்படி இருப்பினும் விகடனில் 1956ல் வெளிவந்த ஜமீந்தார் மகன் தான் தமிழின் முதல் சித்திரக்கதை என்ற விகடனின் கூற்று தவறு என்பது தெரிகிறது. விஸ்வா கூட இது பற்றி கூறி இருந்ததை நண்பர்கள் நினைவு கொள்ளலாம்.

* கரும்பு இதழில் புயலின் புன்னகை என்ற சித்திர தொடர்கதை இடம்பெற்று உள்ளது.

* கண்ணன் சிறுவர் இதழ், தற்போதைய சிறுவர் இதழிகளின் அமைப்பை பிரதிபலிப்பதாக உள்ளது. இரண்டாவது கண்ணனின் அட்டைப்படம் அருமை.

* அணில் அண்ணா, கண்ணன் இதழ்களிலும் சித்திரக்கதைகள் இடம் பெற்றிருந்திருக்கிறது. அணில் அண்ணா அட்டைப்படம் வரைந்தவர் ரமணி.

நண்பர்கள் தங்களின் கருத்துக்களை பகிர்ந்து கொள்ளுமாறு கேட்டுக்கொள்ளப்படுகிறார்கள்.

நன்றி - தமிழம் இணையத்தளம் மற்றும் பொள்ளாச்சி நசன் அவர்கள்

மந்திர மண்னில் மாடஸ்டி

2011-06-01T19:53:00.003+05:30

ஒவ்வொரு முறை ஊருக்கு செல்லும் போது பழைய காமிக்ஸ்களின் சேகரிப்பில் இருந்து சிலவற்றை படிப்பது வழக்கம். இந்த வருடம் படித்த கதைகளுள் ஒன்று மந்திர மண்னில் மாடஸ்டி. எனக்கு பிடித்த லயன் டாப்10 ல் இந்த கதை கண்டிப்பாக இருக்கும்
பாலைவன நாட்டில் நடக்கும் கதை என்பதாலோ சூட்டை குறைக்க (அல்லது அதிகப்படுத்த) மாடஸ்டியுடன் சுமார் பத்து பிகர்கள் (சுமார் பிகர்கள் பத்து என படிக்க கூடாது) இந்த கதையில் களம் இறங்குகிறார்கள்.

பேரழிகியான மாடஸ்டியுடன் அரேபிய ஷேக் ஒருவர் நட்பாக இருக்கிறார். (ஆமாங்க ரெண்டு பேரும் ஜஸ்ட் பிரண்ட்ஸ் தான்). பெய்ரூட்டில் உள்ள ஒரு கிளப்பில் மாடஸ்டியுடன் சூதாடி கொண்டு இருக்கிறார். (நம்ம மன்மோகன் ஜீயும் அடிக்கடி பாரின் போறார். இப்படித்தான் அவரும் டைம் பாஸ் செய்வாரோ). இங்கு சீட்டாடியது போதாதென்று அவருடைய நாட்டிற்கும் மாடஸ்டியை சீட்டாட அழைக்கிறார் ஷேக். வேறு ஏதும் வேலை வெட்டி இல்லாத மாடஸ்டி-வில்லி உடனே கிளம்புகிறார்கள். உடன் வில்லியின் பெண் நண்பர்களான நடன அழக்கிகளும் கிளம்புகிறார்கள்.

ரூம் போட்டு யோசிக்கும் வழக்கம் இல்லை போல

அந்த டயலாக் பலூனை போட வேற இடமே கிடைக்கலையா

இதற்கு அப்புறம் கதை வேறு என்னவாக இருக்க முடியும். நம்ம காமிக்ஸ் ஹீரோக்கள் எங்கேயாவது சுற்றுலா சென்றால் கண்டிப்பாக பக்கத்து நாட்டிலோ அல்லது அந்த நாட்டிலோ எதாவது ஒரு புரட்சி நடந்து கொண்டிருக்கும். நமது காமிக்ஸ் ஹீரோக்கள் எதாவது ஒரு குரூப்பில் சேர்ந்து அந்த புரட்சியை முடிவுக்கு கொண்டு வந்து நீதியை நிலைநாட்டி விட்டு வருதானே வழக்கம். இங்கேயும் அதே நடக்கிறது. இங்கு நாடளும் ஷேக்கை ஓரங்கட்டி விட்டு தான் நாட்டின் அதிபராக ஆக ஷேக்கின் தம்பி முயற்சி செய்கிறார். (அரசு பணத்தில் மாடஸ்டியுன் சீட்டாடுவது போன்ற நல்ல விஷயங்களை செய்யும் ஷேக் பக்கம் தான் மக்கள் ஆதரவு). ஆனாலும் ராணுவத்தையும் தன் கட்டுப்பாட்டி வைத்து கொண்டுவந்து இருக்கும் ஷேக்கின் தம்பி ஷேக் ஊரில் இருந்து வருகையிலேயே கொலை செய்ய திட்டமிடுகிறார். அந்த சூழ்ச்சியினால் மாடஸ்டியின் உடன் வந்த விமான ஊழியர்கள் கொல்லப்படுகிறார்கள். வில்லி தப்புகிறார். மாடஸ்டியும் இளம்பெண்களும் அரண்மனை அந்தபுரத்திற்கு கொண்டு செல்லப்படுகிறார்கள் (அதானே பாத்தேன்).

இந்த டவுசர் போட்ட போலீஸு தொல்ல தாங்கப்பா

அழகிகள் அந்தபுரத்தில், வில்லி வெளியே என இருக்கும் சூழ்நிலையில் அதையும் இதையும் செய்து தப்புகிறார்கள் நம் நீதி காவலர்கள். மீண்டும் ஷேக்கையே அரியனையில் உட்கார வைத்து அழகு பார்க்கின்றனர்.

அருமை சிறுமி கரிமா
இந்த டெம்பிளேட் கதையை சுவாரிஸ்யமாக்கிய பெருமை கரிமா என்ற சிறுமியைச் சாரும். வில்லியை பூதம் என நினைத்து அவள் அடிக்கும் கூத்துகள் அருமை. வில்லியும் அந்த சிறுமியும் பரிமாறிக் கொள்ளும் பாசம் படிப்பதற்கு இனிமையானது. குழந்தையின் மழழை மொழிபெயர்ப்பும் அருமை.

மக்கு பூதத்திற்கு ஆறுதல்

சிறுமியின் சோகம்

இந்த கதை லயனில் 102 வது இதழாக வெளிவந்தது. லயன் சென்சுரி ஸ்பெஷசல் என்ற மெகா கிட் இதழ் வந்த சமயத்தில் வந்திட்ட இதழ். கலக்கலான அட்டைப்படம்.

ஆங்கில வடிவம்
இந்த கதை ஆங்கிலத்தில் Willie de djinn என்ற பெயரில் இணையத்தில் முழுமையாக படிக்க கிடைக்கிறது. அதற்கான இணைப்பு. விஜயன் சார் நாமெல்லாம் கெட்டுப்போய் விடக்கூடாது என்று சென்ஸார் செய்திட்ட சில படங்கள் இங்கே.

லயன் டாப்10 கதைகளும் நாயகர்களும்

இந்த இதழில் லயன் ஆசிரியர் விஜயன் லயன் காமிக்ஸின் டாப்10 கதைகளையும் நாயகர்களையும் வாசகர் தேர்வு அடிப்படையில் பட்டியல் இட்டு இருக்கிறார். டாப்10 கதைகளில் ஒன்றை கூட நான் படித்ததில்லை என்பது எவ்வளவு பெரிய சோகம்

அட்டைபடம் மற்றும் ஆங்கில தலைப்பு உபயம் விஸ்வா. அவரின் இந்த பதிவில் மாடஸ்டியின் அனைத்து கதைகள் பற்றிய தகவல்கள் உள்ளன். இந்த பதிவு இங்குடன் முடிவடையகிறது. படித்து விட்டு உங்கள் கருத்துகளை பகிர்ந்து கொள்ளவும்.

வாண்டுமாமாவின் ஹீரோ சங்கர்

2011-05-01T20:52:00.001+05:30

வணக்கம் தோழர்களே, அனைவருக்கும் உழைப்பாளர் தின வாழ்த்துக்கள், பதிவிடுதலில் விழுந்துவிட்ட பெரிய இடைவெளியை குறைப்பற்காக ஒரு சிறிய பதிவுடன் உங்களை சந்திக்கிறேன். மேகலா பத்திரிக்கை குழுவினர் தனியாக மேகலா காமிக்ஸ் என்ற காமிக்ஸ் பத்திரிக்கை நடத்தி வந்தது நம் அனைவரும் அறிந்தது. அதே போல் அவர்களின் மாத நாவலிலும் எட்டு பக்கங்களை படக்கதைக்கு ஒதுக்கும் வழகத்தினை கொஞ்ச காலம் கொண்டிருந்தனர். பெறும்பாலும் இந்த பக்கங்களை அலங்கரிப்பது நம் வாண்டுமாமாவின் சித்திரக்கதைகளே. குஷிவாலி ஹரிஸ், சமத்து சாரு போன்ற கதாபாத்திரங்களை பார்த்த ஞாபகம் உள்ளது. இதோ இங்கு நீங்கள் பார்க்கும் கதை "ஹீரோ சங்கர்" எனும் சிறுவனுடைய சாகஸம். பார்வதி சித்திரக்கதைகளில் நாம் பார்த்திராத வாண்டுமாமா கதைகளில் இதுவும் ஒன்று. கயவர்களால் கடத்தப்பட்ட ஒரு சிறுமியை ஹீரோ சங்கர் வையாபுரி என்னும் துப்பறியும் அன்பரின் துணையுடன் மீட்பதே கதை. சித்திரங்களை சசி வரைந்துள்ளார். இந்த சித்திரக்கதை 'மே 1996' தேதியிட்ட இதழில் வெளிவந்துள்ளது. இந்த கதையின் சில பக்கங்கள் உங்கள் பார்வைக்கு...

இந்த கதை வெளிவந்த மேகலா இதழ்

சிதம்பர ரகசியம் - நகைச்சுவை சித்திரக்கதை

2011-02-18T21:54:00.004+05:30

தமிழ் காமிக்ஸ் உலகில் கல்கி இதழில் வெளிவந்த தொடர் சித்திரக்கதைகள் மிகவும் முக்கியமான இடத்தை பெறுகின்றன. வாண்டுமாமா, செல்லம், ரமணி, வினு போன்ற ஒப்பற்ற கலைஞர்களின் திறமைகளுக்கு கல்கி இதழ் ஒரு சிறந்த வடிகாலாக விளங்கியது என்றால் அது மிகை அல்ல. இதில் வாண்டுமாமாவின் பல கதைகள் பார்வதி சித்திரக்கதைகள் இதழ் மூலம் மறுபதிப்பு செய்யப்பட்டு பெரும் வெற்றி பெற்றதை நாம் அறிவோம். இதோ இங்கு நாம் பார்க்கும் சித்திரக்கதை தொடர் ஒரு வித்தியாசமான கதை மற்றும் சித்திர அமைப்பு உடைய ஒரு சித்திரக்கதையாகும்.

தமிழில் படைக்கப்பட்ட சித்திரக்கதைகளில் நகைச்சுவை கதைகளின் பங்கு சற்று குறைவு போல எனக்கு ஒரு தோற்றம் தெரிகிறது. அதிலும் வெளிவந்த நகைச்சுவை கதைகளின் சித்திரங்கள் சாதாரண சித்திரங்களிலேயே இருக்கும். (உ-ம் பலே பாலு, நந்து சிந்து மந்து). லக்கிலூக், சிக்பில் போன்று கார்டூன் வகை சித்திரங்களுடன் தமிழ் காமிக்ஸை பார்ப்பது மிகவும் அறிது. இன்றை தினத்தந்தி - தங்க மலர், சிறுவர் மணி போன்ற இதழ்களில் கார்டூன் வகை சித்திரங்களை அவ்வப்போது பார்க்க முடிகிறது. ஆனால் இக்கதைகள் யாவும் சிறிய வயது குழ்ந்தைகளுக்கானதே. தரமும் குறைவு.

சிதம்பர ரகசியம்:

இந்த பதிவில் நாம் பார்க்கும் சித்திரக்கதை 1970 ல் துவங்கி கல்கியில் தொடர்கதையாக வெளிவந்த ஒன்று. கோமதி சுவாமிநாதன் என்பவரின் கதைக்கு ஓவியர் ராமு சித்திரங்கள் வரைந்திருக்கிறார். கோமதி சுவாமிநாதனை பற்றி googling செய்த போது இவர் ஒரு நகைச்சுவை எழுத்தாளர் மற்றும் நாடக ஆசிரியர் என்பது தெரிகிறது.

சிதம்பர ரகசியத்தின் கதை இது தான். சிதம்பரம் பர்மாவில் இருந்து திரும்பவிருக்கும் ஒரு பெரிய பணக்காரர். அவரின் சொத்துக்கு நேரடி வாரிசு யாரும் இல்லை. தனது உறவினர்கள் யாரையும் பார்த்திராத இவர் எப்படியோ தனது உறவினர்களை கண்டறிந்து தந்து மாளிகைக்கு வர அழைக்கிறார். சிதம்பரம் ஊரில் இல்லாத போது அவரின் சொந்தக்காரர்கள் அவரின் வீட்டுக்கு வருகிறார்கள். அங்கு மாளிகையின் விசுவாசமான வேலைகாரனும் புதிதாக சேர்ந்த சமையல்காரனும் இருக்கிறார்கள். எவ்வித சந்தேகமும் இல்லாமல் உறவினர்களிடையே சொத்துக்காக போட்டி நிலவுகிறது. ஆக இந்த ஆறு ஏழு கதாபாத்திரங்கள் மாளிகையில் அடிக்கும் கூத்துகளே கதை. கடைசி சில பக்கங்களில் சிதம்பரம் வருகிறார். அவர் யாருக்கு சொத்துகளை கொடுத்தார் என்பது முடிவு. ஒரு முழுநீள நகைச்சுவைக கதைக்கான அனைத்து அம்சங்களுடன் கதை விளங்குகிறது.

கதையின் முதல் சில பக்கங்கள் உங்கள் பார்வைக்கு......

கதை முழுவது விழுந்து விழுந்து சிரிக்கவில்லை எனினும் பல இடங்களில் புன்னகையையும் சில இட்ங்களில் சிரிப்பையும் கொடுக்கிறது இந்த கதை. சித்திரங்களின் தரம் அருமை. ராமுவின் கைவண்ணம் பற்றி ஏற்கனவே தமிழ்வாணன் கதைகளுக்கு வரைந்திட்ட ஓவியங்கள் மூலம் ஒரு சிறப்பான அபிப்பிராயம் இருந்தது. இந்த சித்திரக்கதையை படித்த பின் அந்த அபிப்பிராயம் இன்னும் கூடுகிறது. அவரின் திறமையை தமிழ் பத்திரிக்கைகள் சரியாக பயன்படுத்தி கொண்டார்களா என கூட சந்தேகம் வருகிறது.

கோமதி சுவாமிநாதன

(புகைப்படம் உபயம் - அப்புசாமி இணையதளம்)

அந்தகால பேச்சுவழக்கு, சினிமா மோகம், நாடக மோகம், உடைகள், ஏழை பணக்காரர்கள் உறவு, வாகனங்கள், அரசியல் கமெண்டுகள் என நமது அப்பா, தாத்தாக்கள் காலத்திற்கு ஒரு பயணம் சென்றுவிட்டு வந்த அனுபவத்தை கொடுக்கிறது இந்த கதை. நான் படித்தது தொடர்கதை பைண்டிங் இதழ் என்பதால் அந்த கால விளம்பரங்களையும் மற்றும் சில கட்டுரைகளையும் போனஸாக படிக்க முடிந்தது. இந்த தொடர்கதை கல்கியின் அட்டைபடத்திலும் இடம்பெற்று இருக்கிறது. இது அந்த கால கல்கி நிறுவனம் சித்திரக்கதைகளுக்கு கொடுத்து வந்த முக்கியத்துவத்தை தெரிவிக்கிறது. கோமதி சுவாமிநாதன் - ராமு கூட்டணியில் எத்தனை சித்திரக்கதைகள் வந்துள்ளன எந்த்தெரியவில்லை என்றாலும் தமிழில் ஒரு சிறந்த சித்திரக்கதையை கொடுத்த பெருமையை பெறுகிறது இந்த கூட்டணி.
பதிவை படித்த நண்பர்களே, தவறாமல் உங்கள் கருத்துகளையும் தெரிவியுங்கள்.

குறிப்பு : மங்க்கி காமிக்ஸ் பற்றிய பதிவு கூடுதல் ஸ்கேன்களுடன் update செய்யப்பட்டுள்ளது. அதற்கான இணைப்பு

(எவ்வித லாப நோக்கமும் இன்றி சித்திரக்கதையின் சில பக்கங்கள் இங்கே வழங்கப்பட்டு இருக்கின்றன. உர்மையாளர் ஆட்சேபித்தால் இவை நீக்கப்படும்)

XIII - இரத்தப்படலம் அனுபவங்கள்

2011-02-15T22:28:00.007+05:30

(பல நாட்களுக்கு முன்பு தயாரித்த பதிவு. சிறிய தாமத்துடன் பதிவேற்றம் செய்யப்படுகிறது)
கடந்த இரண்டு மூன்று நாட்களாக எங்கள் வீட்டில் டீ.வி ஓடவில்லை, கணிப்பொறி இயங்கவில்லை.... அந்த அளவு இரத்தப்படலம் என்னை ஆக்கிரமித்து இருந்தது. ஒரு வழியாக படித்து முடித்து விட்டேன். இங்கு எனக்கும் இரத்தப்படலத்திற்கும் இருக்கும் 'பூர்வ ஜென்ம' பந்தத்தை இங்கு நினைவுகூர்கிறேன

XIII எனக்கு முதன்முதலில் அறிமுகம் ஆகியது பாகம் - 5 லில். அந்நாளில் ஒன்னுமே புரியாத மொக்கை கதையாக பட்ட அந்த புத்தகத்தை கொடுத்து வேறு ஒரு 'நல்ல' காமிக்ஸ் புத்தகம் வாங்கி கொண்டேன். (அநேகமாக ராணி காமிக்ஸ் மாயாவி சாகஸம் என் எண்ணுகிறேன்). போக போக பாகம் 6, 7 படிக்கும் போதும், அவ்வப்போது லயன் ஆசிரியர் மற்றும் வாசகர்கள் இரத்தப்படலம் பற்றி உயர்வாக பேசும் போதும் இரத்தபடலம் முழுவது படிக்க வேண்டும் என்ற ஆர்வம் தலை தூக்க ஆரம்பித்தது. ஆகையால் முந்தய பாகங்களை சேகரிக்க ஆரம்பித்தேன். 1,2,5,6,7,8,9,10 வரை சேகரித்து விட்டாகி விட்டது. (1, 2 - ஐஸ்பெர்க் காமிக்ஸ் உபயம்). ஆனாலும் 1,2 மற்றும் 5, 6 பாகங்கள் மட்டுமே படித்திருந்தேன். பழைய பாகங்கள் அனைத்தும் கிடைத்த பின் மொத்தமாக படித்து கொள்ளலாம் என்று இரத்தப்படலம் படிப்பதையே நிறுத்தி விட்டேன்.
இந்நிலையில் விஜயன் அவர்களின் 1-18 பாகங்களை ஒரே புத்தகத்தில் வெளியிடும் திட்டத்தை கேட்டதும் மகிழ்ச்சி. ஆனால் இதழ் வெளிவருவதில் இருந்த தாமதம் அந்த மகிழ்ச்சியை சிறிது சிறிதாக கரைத்து கொண்டிருந்தது. கடைசியாக அனைத்து பாகங்களையும் ஒரு சேர ஒரே புத்தகத்தில் பார்த்ததும் நான் அடைந்த மகிழ்ச்சிக்கு அளவே இல்லை. ஆக இத்தனை வருடங்களாக காத்திருந்து படித்தது அருமையான அனுபவம்.

இந்த கதையில் என்னை கவர்ந்த ஒரு சில கட்டங்களை உங்களுடன் பகிர்ந்து கொள்ளலாம் என எண்ணுகிறேன். இவை அனைத்தும் கதையின் முக்கிய திருப்பங்களோ அல்லது ஆழமான உண்ர்ச்சி குவியல்களோ அல்ல. ஜஸ்ட் போகிற போக்கில் ரசிகனை கவர்ந்திடும் கட்டங்கள். இது போன்று எண்ணற்ற சம்பவங்கள் கதையினில் வருகிறன. ஆனால் random ஆக ஒரு சில கட்டங்களை இங்கே பகிர்ந்து கொள்கிறேன்.

ஒரு தலை ராகம்:
தனது காரியம் நிறைவேறுவதற்காக காதலியாக நடித்து இந்த டாக்டரை ஏமாற்றுகிறாள் நம் அனைவர் மனம் கவர்ந்த ஜோன்ஸ். அம்மணி ஏமாற்று பேர்வழி என தெரிந்தும் இந்த டாக்டரின் தீவிர காதல் நமக்கு ஆச்சிரியம் கொடுக்கிறது. இந்த காதல் விளையாட்டில் டாக்டரின் உயிரும் போவது கொடுமை. ஐய்யோ பாவம் டாக்டர். என்னதான் ஜோன்ஸ் காதலை பயன்படுத்தி ஏமாற்றி இருந்தாலும் நமக்கு அவர் மேல் கோபம் வரவில்லை. அது தான் அந்த பாத்திரப்படைப்பின் வெற்றி.

ஜோன்ஸின் தியாகம்
மங்கூஸ் ஆட்களுடன் XIII க்காக சண்டையிடும் போது ஏற்படும் காயத்தினால் தனது தாய்மையை இழக்கிறார் ஜோன்ஸ். ஆனால் அந்த விஷயத்தை கேள்விபட்ட உடன் அழுது கூக்குரல் போடாமல் கூலாக இருப்பது தாலி செண்டிமெண்ட், அம்மா செண்டிமெண்ட் பார்த்து பழகிய நமக்கு புதுசு.

ஜோன்ஸின் சக்களத்தி சண்டைகள்
அது என்னமோ தெரியவில்லை நம்ம XIII ஐ பார்த்தவுடன் பெண்கள் மயங்கிவிடுகிறார்கள்.... அடிக்கடி இது போல நடந்திடும் சம்பவங்கள் ஜோன்ஸை கோபப்படுத்திறது. அதை அதிகமாக வெளிகாட்டாமல் XIII ஐ ஜோன்ஸ் கலாய்த்திடும் கட்டங்கள் சுவாரிஸ்யமானவை. இந்த காட்சிகளை ரசிக்க செய்ததில் மொழிபெயர்ப்பிற்கும் சிறந்த பங்கு உண்டு. இதோ சாம்பிளுக்கு ஒன்று

காதலர்களின் ஊடல்
ஜோன்ஸுக்கும் XIIIக்கும் அவ்வப்போது வந்திடும் ஊடல்கள் இனிமையானவை. இதோ அவற்றில் ஒன்று.

மங்கூஸ் - நீ ரொம்ம்ப நல்லவண்டா
பிரஸிடெண்ட் வாலியின் வண்டவாளங்கள் கொலைவெறி புகழ் மங்கூஸ் மூலம் உலகிற்கு தெரிவது எதிர்பாரா திருப்பம். தமிழ் சினிமாவில் கூட இது போன்ற 'எதிர்பாரா' திருப்பங்கள் வருவதுண்டு. இரினாவின் மங்கூஸ் பற்றிய கமெண்ட்டை பாருங்களேன். (மூன்றாவது படம்)

ஆண்டியை மடக்கப்பார்க்கும் பொடியன் - No comments..

புஸ்ஸுனு போன புதையல்:
நாம் படிக்கு தமிழ் காமிக்ஸ்களில் என்றுமே ஆரம்பத்தில் செம பில்டப்புடன் தொடங்கும் புதையல் மேட்டர்கள் சப்பென்று முடிந்துவிடுவது வழக்கம். இங்கு அதே கதை தான். (எந்த காமிக்ஸ் ஹீரோவாவது முழு புதையலையும் கைபற்றி சந்தோஷமாக இருந்து நீங்கள் பார்த்து இருக்கிறீர்களா??)

இமாலய சாதனை என்றாலும் குறைகள் இல்லாமல் இல்லை. எனக்கு பட்ட சில சிறிய குறைகள்

1. இதழின் சில இடங்களில் குறிப்பாக கதையில் மழை பெய்யும் இடங்களில் மிகவும் மோசமாக இருக்கிறது அச்சுத் தரம். ஒன்றுமே படிக்க முடியவில்லை (உ-ம் பக்கங்கள் 148 ~ 151, 509 ~ 514)

2. இந்த இதழில் படைப்பாளிகள் பற்றி விரிவாகவே கூறி உள்ளார் விஜயன் சார். நன்றி. அதே சமயம் இந்த இமாலய சாதனை படைக்க உதவிய மொழிபெயர்ப்பாளர்கள், அச்சு கோப்பாளர்கள் மற்றும் தொழிநுட்ப வல்லுனர்களின் பெயரையும் ஆசிரியர் வெளியிட வேண்டும் என்பது என் எண்ணம்.

கடைசியாக,
இதுவரை இல்லாத காமிக்ஸ் அனுபவத்தை வழங்கிய (அதுவும் இவ்வளவு குறைந்த விலையில்) விஜயன் சாருக்கும் அவரின் டீம் க்கும் என் நன்றிகள். சற்று பிராக்டிகலாக பார்க்கையில் எதிர்காலத்தில் இது போன்ற அனுபவம் தமிழில் கிடைக்க வாய்ப்பு மிக மிக அறிது எனவே தோன்றுகிறது. அதுவே இந்த இதழின் வெற்றி.

குறிப்பு 1 - இவ்விதழ் பற்றி குமுதம், குங்குமம் இதழிகளில் குறிப்பிட்டு உள்ளார்கள். மிகவும் மகிழ்ச்சியான செய்தி. (பார்க்க - விஸ்வாவின் பதிவுகள்)

குறிப்பு 2 - கேப்டன் டைகரின் 'இரும்பு கை எத்தன்' ஞாபகம் இருக்கிறதா?? பாதியில் தொங்கி கொண்டிருக்கும் அந்த கதையும் இதே போல் ஒரே ஷாட்டில் வெளியிட்டால் நன்றாக இருக்கும்...

மாயாஜால் காமிக்ஸ்

2011-01-27T20:37:00.001+05:30

நண்பர்களே, மணிமேகலை பிரசுரத்தில் வெளிவந்த தாராவும் குகை மனிதர்களும் நியாபகம் இருக்கிறதா? அச்சித்திரக்கதையை வழங்கிய ராஜதிலகம் அவர்கள் முன்பு மாயாஜால காமிக்ஸ் மூலம் மேலும் பல சித்திரக்கதைகள் வழங்குவதாக கூறி இருந்தார்.

அதற்கான முயற்சிகளை கீழ்காணும் இணைய பக்கம் மூலம் ஆரம்பித்துள்ளார்

மாயாஜால் காமிக்ஸ் இணைய பக்கம்

அவரது இணையப்பக்கத்தில் கீழ்காணும் காமிக்ஸ் வரிசைகள் உள்ளன

1. யம் யம் யமராஜ் - எமராஜனை நாயகனை கொண்ட கதை தொடர்
2. அர்ஜூன் - செவ்விந்திய நாயகன்
3. விடி வெள்ளி - செவ்விந்திய வீராங்கனை
4. வாலி - வேற்றுகிரகவாசிகள் பற்றிய கதை

யம் யம் யமராஜ்

அர்ஜூன்

விடி வெள்ளி

வாலி

இந்த காமிக்ஸ் வரிசைகளை புத்தக வடிவில் வழங்கிடுவது பற்றி ஆசிரியர் இந்த அறிவிப்பினை வெளியிடுகிறார்.

இது போன்ற முயற்சிகள் தமிழ் காமிக்ஸின் அடுத்த படிக்கு ரொம்ப முக்கியம். தரமான காமிக்ஸ் கதைகளாக இருந்தால் தமிழ் ரசிகர்கள் என்றும் வரவேற்பு கொடுப்பர்கள் என நம்புகிறேன். மாயாஜால் காமிக்ஸ் சிறப்பாக வெளிவந்து வெற்றி பெற வாழ்த்துக்கள்.

புத்தக கண்காட்சியில் காமிக்ஸ் சேகரிப்பு

2011-01-11T22:18:00.001+05:30

புத்தக கண்காட்சிக்கு செல்வது இனிது, அங்கு காமிக்ஸ் வாங்குவது அதனினும் இனிது. இதோ இந்த ஆண்டு புத்தக கண்காட்சியில் நான் சேகரித்த காமிக்ஸ்கள்.
நான் சென்றது சனிக்கிழமை மாலை என்பதினால் கூட்டத்திற்கு பஞ்சம் இல்லை. விற்பனையாளர்களிடம் சரியாக விசாரிக்க கூட அனுமதிக்காத கூட்டம். இங்கு விஸ்வாவின் புத்தக கண்காட்சி பற்றிய பதிவு மிகவும் பயனுள்ளதாக இருந்தது.

வாங்க திட்டமிட்டவை:

1. மர்ம மாளிகையில் பலே பாலு (வானதி) -
2. வாண்டுமாமா சித்திரக்கதைகள் தொகுதி-1 (வானதி) - ஏற்கனவே கைவசம் இருந்த பிரதி தொலைந்து விட்டது
3. மாய மோதிரம் (வானதி)
4. புலி வளர்த்த பிள்ளை (வானதி)
5. தமிழ் அமர் சித்திரக்கதைகள் (4 or 5 books Based on title) (கிழக்கு)
6. ஈரான் 1 & 2 (விடியல்)
7. கிமுவில் சோமு (நர்மதா)

வாங்கியவை :

1. மர்ம மாளிகையில் பலே பாலு - நீண்ட காலமாக கைக்கு கிடைக்காமல் போக்கு காட்டி கொண்டிருந்தது. இதோ இன்று பிடித்து விட்டேன்.

2. கிமுவில் சோமு - சென்ற ஆண்டு புத்தக கண்காட்சியில் வாங்க வேண்டியது. இப்போது தான் அகப்படுகிறது.

3. நிலாக்குதிரை:

வாண்டுமாமாவின் பலநாட்டு சிறுகதைகளின் தொகுப்பு. இந்த புத்தகம் பற்றி கேள்விபட்டதே இல்லை. ஆகையால் இது ஒரு
surprise piece. ஓவியர் மாருதியின் அட்டைபடம் அழகு. மொத்தம் 24 சிறுகதைகள் உள்ளன. பெரும்பாலும் அயல் நாட்டு சிறுகதைகள். இவிதழில் நம் மதியில்லா மந்திரியை பார்த்தது ஒரு எதிர்பாரா நிகழ்வு. மதியில்லா மந்திரியின் மூன்று கதைகள் சிறுகதை வடிவில் வழங்கப்பட்டுள்ளது. முதல் கதையை லயனில் பார்த்ததாக நியாபகம். இதழின் மற்ற கதைகளும் ஆர்வமூட்டுவதாக உள்ளன. வாண்டுமாமா ரசிகர்கள் கண்டிப்பாக வைத்திருக்க வேண்டிய புத்தகம்.

4. புலி வளர்த்த பிள்ளை :
இந்த புத்தகம் கிடைப்பதற்கான நம்பிக்கை மிகவும் குறைவாகவே இருந்தது. கிடைத்தது ஒரு ஆச்சர்யம். மற்றும் ஒரு ஆச்சர்யம் வீட்டில் புத்தகத்தை திறந்து பார்க்கும் போது கிடைத்தது.
இக்கதையின் மூன்றாவது பாகம் ஓவியர் செல்லம் கைவண்ணத்தில் சித்திரக்கதை வடிவில் வழங்கப்பட்டிருக்கிறது. புலி வளர்த்த பிள்ளையின் இறுதி பாகம் சித்திரக்க்தை வடிவம் என்பது பூந்தளிரில் ஏற்கனவே பார்த்த நியாபகம். ஆனால் மாறன் மல்லப்பன் கதையும் இதே போல் ஒரு பகுதி சித்திரக்க்தையாக இருந்தும் வானதியில் புத்தகமாக வெளியிடும் போது முழு நாவல் வடிவிலேயே வெளியிட்டார்கள். அதையே இங்கும் எதிர்பார்த்த எனக்கு சித்திரக்கதை வடிவம் ஒரு இன்ப அதிர்ச்சி.

5. தமிழ் அமர் சித்திரக்கதை: இந்த தொகுப்பில் குறைந்தது 5 புத்தகங்களாவது வாங்கலாம் என்று எண்ணியிருந்தேன். (ஏற்கனவே இரண்டு இதழ்கள் கைவசம் உள்ளன). ஆனால் அந்த நேரத்தில் ஏற்கனவே பட்ஜெட் எல்லை மீறி போய் இருந்ததால் சாம்பிளுக்கு ஒன்று மட்டும் வாங்கினேன். கூடிய விரையில் ஏனைய இதழ்களையும் வாங்கிட வேண்டும். கிழக்கு பதிப்பம் இந்த சித்திரக்கதைகளுக்கு கவனத்தை கவரும் வகையில் பேனர்கள் வைத்து இருந்தது காமிக்ஸ்களுக்கான மரியாதை. கிழக்கு பதிப்பகம், மொழிமாற்ற காமிக்ஸ்கள் போலவே தமிழ் மொழியில் புதிதாக உருவக்கபடும் காமிக்ஸ்களையும் வெளியிட வேண்டும் என்பது என் விருப்பம். நான் பார்த்த வரை இந்த காமிக்ஸ்களுக்கு வரவேற்பு இருப்பதாகவே படுகிறது.

கிடைக்காதவை :

1. ஈரான் 1&2 - விடியல் பதிப்பகம் கண்ணில் படவே இல்லை. நேரமின்மையும் அதிக கூட்டமும் பதிப்பகத்தை தேடும் ஆர்வத்தை குறைத்து விட்டன. இந்தவாரம் செல்லும் நண்பர்கள் மூலமாக வாங்க திட்டமிட்டுள்ளேன்

2. மாய மோதிரம் & வாண்டுமாமா சித்திரக்க்தைகள் தொகுதி 1 - வானதியில் இருப்பு இல்லை என்று கூறி விட்டார்கள்.

புத்தக கண்காட்சியில் காமிக்ஸ் சேகரிப்பு பற்றிய இந்த பதிவை படித்துவிட்டு கருத்து சொல்ல மறக்காதீர்கள் நண்பர்களே.

மர்ம வீரன் ராஜராஜ சோழன் (Marma veeran Rajaraja cholan)

2010-11-28T05:45:00.002+05:30

வணக்கம் நண்பர்களே. விஜயன் சாரின் இரத்தப்படலம் ஜம்போ ஸ்பெஷல் காமிக்ஸ் வலைதளங்கள் அனைத்திலும் புத்துணரச்சி ஏற்படுத்தி உள்ளது கண்கூடாக தெரிகிறது. இந்த மகிழ்ச்சியான தருனத்தில் தஞ்சை நகரில் இருந்து வெளிவந்த ஒரு காமிக்ஸ் முயற்சி பற்றி இந்த பதிவில் பார்ப்போம்.

நமது தமிழ் கலாச்சாரம் மற்றும் வரலாறு பற்றி நாம் தெரிந்து கொள்ள வேண்டும் என்றால் பெரிய பெரிய வரலாற்று புத்தகங்களை புரட்டி தான் தெரிந்து கொள்ள வேண்டும் என்ற நிலை இன்று உள்ளது. பள்ளிகளில் புகட்டப்படும் கல்வில் நம் சொந்த இன வரலாறு பற்றி அதிகம் கற்பிக்கப்படுவதில்லை. நெப்போலியன், அசோகா, ஷாஜகான் போன்ற மன்னர்களை விட ராஜராஜ சோழன் மற்றும் கரிகால சோழன் பற்றி நம் மாணவர்கள் குறைவாகவே தெரிந்து வைத்துள்ளனர். முதல் மற்றும் இரண்டாம் உலக போர் பற்றி நமக்கு தெரிந்ததை விட இந்திய - சீன போர் பற்றி குறைவாகவே நமக்கு தெரியும். அவள்ளவு ஏன்? தீரன் சின்ன மலை என்ற தமிழ் வீரன் ஆங்கிலேயர்களை இரண்டு போர்களில் வீழ்த்தி உள்ளான். அவனை பற்றி எந்த பாடபுத்தகத்திலும் சரி எந்த வெகுஜன பத்திரிக்கையிலும் சரி நான் படித்தது கிடையாது (சிறிது காலம் முன் வரை). உங்களுக்கு தெரிந்த சில மாணவர்களிடம் மேற்கண்ட தகவல்கள் பற்றி சில கேள்விகள் கேட்டு பாருங்கள். நாம் நம்முடைய சொந்த கலாச்சாரம் பற்றியும் நம் தமிழ் வரலாறு பற்றியும் எந்த அளவு தெரிந்து வைத்துள்ளோம் என தெரியும். நம்முடைய வரலாற்றுக்கு முக்கியத்துவம் கொடுக்கும் வகையில் பாடப்புத்தகங்கள் தயாரிக்கப்பட்டால் இந்த குறை ஓரளவு தீரும்.

அட்டைபடம்

முகப்பு பக்கம்

அதே சமயம் நமது ஊடகங்களிலும் தமிழ் மன்னர்கள் பற்றிய கதை, கட்டுரை மற்றும் தகவல்கள் நிறைய வரவேண்டும். தமிழ் மன்னர்கள் பற்றி கொண்டு சேர்க்கும் முயற்சிகள் அவ்வப்போது நடந்திடவே செய்கின்றன. கல்கியின் படைப்புகள் இதற்கு ஒரு சிறந்த உதாரணம். தமிழ்நாட்டின் மன்னர்கள் கால வாழ்க்கை முறை பற்றி பாடப்புத்தகங்களின் மூலம் தெரிந்து கொண்டதை விட கல்கியின் நூல்கள் மூலமே நான் அதிகம் அறிந்து கொண்டேன் என்பதுதான் உண்மை. இந்த பதிவில் நாம் பார்க்கவிருக்கும் நூலானது தமிழ் மன்னன் ராஜராஜ சோழனின் பெருமைகளை சிறுவர்களிடம் கொண்டு சேர்க்கும் ஒரு முயற்சியாகும்.

கன்னிதீவு, தங்க கண்ணாடி, ராஜகம்பீரன் போன்ற சித்திரக்கதைகளை வழங்கிய ஓவியர் தங்கம் அவர்களின் துனைவியார் ஓவியர் சந்திரோதயம் அவர்களின் கைவண்ணத்தில் 'மர்ம வீரன் ராஜராஜ சோழன்' உருவாகி உள்ளது. தரமான காகிதத்தில் அற்புதமான அட்டைபடத்துடன் வெளியிடப்பட்டுள்ளது. 2005 லேயெ வந்துவிட்ட இந்த இதழ் இப்போதுதான் கையில் கிடைத்தது. விலை ரு.60

புத்தக விபரங்கள்

முன்னுரை

அணிந்துரை

சோழ அரசு வளமுடனும், பாண்டிய அரசு வீழ்ச்சி அடைந்த நிலையில் இருந்த காலகட்டத்தில் இந்த கதை துவங்குகிறது. சோழ இளவரசி குந்தவைக்கு குறி வைத்து பாண்டியர்கள் தீட்டும் சதி திட்டத்துடன் கதை ஆரம்பிக்கிறது. அதே நேரத்தில் நாகையில் சோழ இளவரசர் அருள்மொழி ஒரு முக்கியமான கடற்பயணம் மேற்கொள்வதற்கான முன்னேற்பாடுகளில் ஆழ்ந்துள்ளார். கடற்கொள்ளையர்களை ஒழித்து தமிழக வாணிபர்களுக்கு பாதுகாப்பு அளிப்பதே அவரது கடற்பயனத்தின் நோக்கம். இந்நிலையில் அவர் பெருமதிப்பு வைத்திருக்கும் புத்த பிட்சுகள் புத்த சிலையை சாவகம், காம்போஜம் போன்ற தீவுகளுக்கு கொண்டு சேர்க்கு புனித பணியையும் இளவரசரிடம் கொடுக்கிறார்கள். இந்த நேரத்தில் தான் தன் அக்காவிற்கு ஆபத்து இருப்பதை சோழ நாட்டு ஒற்றர்கள் மூலம் தெரிந்து கொள்கிறார். இளவரசர் மாறுவேடத்தில் பழையாறுக்கு பயணமாகிறார். அங்கு தன் சகோதரிக்கு நிகழவிருந்த ஆபத்துகளை களைகிறார். பாண்டிய எதிரிகளை அழிக்கிறார். இது தான் கதை.

கதாபாத்திரங்கள் அறிமுகம்

கதையின் ஆரம்பம் (பாண்டிய ஒற்றர்களின் திட்டம்)

குந்தவை - அருள்மொழி சந்திப்பு

சிறுவர்களை குறி வைத்து கதை புனையப்பட்டிருப்பதால் 'தீவிர' இலக்கிய தாகத்துடன் படிப்பவர்களுக்கு ஏற்ற இதழ் இதுவல்ல. சிறுவர்களுக்கான படைப்பு என்ற வகையில் இது ஒரு மிகச்சிறந்த படைப்பு. சித்திரங்கள் நன்றாக உள்ளன. எடிட்டிங்கில் மட்டும் சிறிது அதிக கவனம் செலுத்தியிருக்க வேண்டும் என்பது ஒரு சிறிய குறை. ஆசிரியர் கல்கியில் கதாபாத்திரங்களை கொண்டே இந்த கதையில் பாத்திரங்களை படைத்திருக்கிறார். கதை நடைபெறும் காலகட்டமும் பொன்னியின் செல்வன் காலகட்டமே. ஓவியர் மணியம் கொடுத்த உருவங்களிலே கதாபாத்திரங்களை உலாவிடுகிறார் ஆசிரியர் சந்திரோதயம். இந்த புத்தகத்தில் சித்திரக்கதை தவிர 'சித்திரமும் மொழியும்' எனற கட்டுரையும் இடம் பெற்றுள்ளது. இதில் பழைய சித்திர எழுத்து முறை பற்றியும் இன்ன பிற தகவல்களும் இடம் பெற்றுள்ளன. தமிழின் முதன் முதலில் அச்சிடப்பட்ட புத்தகத்தை பற்றியும் கூறுகிறார்கள். பயனுள்ள தகவல்கள். ஆசிரியர் சந்திரோதயம் அவர்கள் ஒரு ஓவிய ஆசிரியர் என்பது இங்கு ஒரு கூடுதல் தகவல். ஆசிரியர்க்கு ஓவியத்திலும் வரலாற்றிலும் ஒரு சேர ஆர்வம் இருப்பது புத்தகத்தில் தெளிவாய் தெரிகிறது. ஆர்வம் மட்டுமே முதலாய் கொண்டு இந்த முயற்சியினை மேற்கொண்டுள்ளனர் தங்கம்-சந்திரோதயம் தம்பதியினர். அவர்களுக்கு நன்றியும் வாழ்த்துக்களும் தெரிவித்து கொள்கிறேன்.

சித்திர எழுத்துக்கள் பற்றிய கட்டுரை

ஆசிரியர் பற்றி

இந்த புத்தகம் இன்னும் ஆசிரியரிடம் இருப்பு உள்ளது. கீழ்கண்ட முகவரிக்கு M.O அனுப்பி இந்த புத்தகத்தை வாங்கி விடலாம். நீங்கள் இன்னும் படிக்கவில்லை என்றால் 'ராஜகம்பீரன்' சித்திரக்கதை புத்தகத்துடன் இதனுடன் வாங்கிட மறந்திட வேண்டாம். M.O அனுப்பி பெறுவதில் ஏதேனும் சிக்கல் இருந்தால் முகவரியில் கொடுக்கப்பட்டிருக்கும் தொலைபேசிக்கு தொடர்பு கொண்டால் புத்தகம் வாங்குவது தொடர்பான தகவல்களை அவர்களே தெரிவித்து விடுவர். நண்பர்களை இப்போதும் புத்தகம் வாங்கி படித்த பிறகும் நங்களுடைய கருத்துக்களை இங்கு பகிர்ந்து கொள்ள வேண்டுகிறேன்.

தினத்தந்தியில் ராஜகம்பீரன் பற்றிய மதிப்புரை படிக்க

ராஜகம்பீரன் சித்திரக்க்தை பற்றிய முழுமையான பதிவை படிக்க

தினமணியில் தங்கம் தம்பதி பற்றிய கட்டுரை படிக்க

ரஷ்ய சித்திரக்கதைகள் (Russian comics)

2010-11-14T17:37:00.002+05:30

சிறிது நாட்களுக்கு முன்பு எழுத்தாளர் எஸ்.ராமகிருஷ்ணன் அவர்களின் வலை தளத்தில் புத்தக வாசிப்பு பற்றிய ஒரு கட்டுரையில் தன் சிறு வயதில் படித்த படக்கதை ஒன்று பற்றி இவ்வாறு குறிப்பிடுகிறார்.

அந்த பதிவினை படிக்க இங்கே கிளிக்கவும்
\\\சிறுவயதில் படித்த படக்கதை ஒன்று.

ஒரு பூனை ஒன்று நூல்கண்டை உருட்டிக் கொண்டிருக்கிறது. நூல் உருண்டு உருண்டு போகிறது. பூனை நூலின் பின்னாலே விரட்டி போகிறது. முடிவில் நூல் முடிந்துவிடுகிறது. பூனை நூல் எங்கே போனது என்று புரியாமல் திகைத்து போய் நிற்கிறது. அந்த திகைப்பு அற்புதமானது.இந்த சித்திரக்கதை எனக்கு மிகவும் பிடித்தது. எட்டே வண்ணச்சித்திரங்கள். வெறுமையை புரிந்து கொள்ள முடியாத பூனை தான் வாசகனின் மனது.\\\
இதை படித்த உடன் என் மனதில் அட இது போன்ற ஒரு கதையை நாம் எங்கயோ படித்திருக்கிறோமே என்று பட்டது. அப்போதே அடுத்த முறை ஊருக்கு போகும் போது பழைய புத்தகங்களை புரட்டி போட்டாவது இந்த சித்திரக்கதை எதில் வந்தது என பார்த்து அந்த இதழை எடுத்திட வேண்டும் என் எண்ணிக்கொண்டேன். அவ்வாறே திபாவளி விடுமுறையில் ஊருக்கு சென்ற போது சில மணி நேர தேடல்களின் முடிவில் அவ்விதழினை கையகப்படுத்தினேன்.
எஸ்.ராமகிருஷ்ணன் அவர்கள் குறிப்பிடும் அந்த சித்திரக்கதை மற்றும் அவ்விதழின் அட்டைபடம் இதோ....

அட்டைப்படம்

பூனையும் நூல்கண்டும்

அனேகமாக இந்த புத்தகம் தான் எனக்கு முதன்முதலில் வாங்கி கொடுக்கபட்ட புத்தகம் என எண்ணுகிறேன். இந்த இதழ் ரஷ்யாவின் ராதுகோ பதிப்பகம் இந்தியாவின் நியு சென்சுரி புக் ஹவுஸ் மூலமாக 19வெளியிட்டு இருக்கிறது. அட்டகாசமான அச்சுத்தரம், சிறப்பான சித்திரங்கள், வேடிக்கையான கதைகள் என ஒரு சிறந்த குழந்தைகள் புத்தகமாக திகழ்கிறது. Off course இன்று இந்த புத்தகங்கள் கிடைப்பதில்லை.
இதே இதழில் இடம்பெறும் வேறு சில சித்திரக்கதைகள். சித்திரக்கதைகளுக்கான தலைப்புகள் ரசிக்கத்தக்கதாக இருக்கிறது.

தவளைகளின் அட்டகாசம்

எங்கே என் தொப்பி

வால் இழுக்கும் போட்டி

இந்த எளிய சித்திரக்கதைகள் எப்படி இருக்கின்றன?? படித்துவிட்டு பதிவை பற்றிய உங்கள் கருத்துகளை தெரிவிக்க வேண்டுகிறேன்.

அப்புறம் சொல்ல மறந்து விட்டேன். இரத்தப்படலம் கிடைக்கப்பெற்ற அனைவருக்கும் வாழ்த்துக்கள். என்னை போன்ற கிடைக்காதோர்க்கு சீக்கிரம் கிடைக்க வாழ்த்துக்கள்

Update on 09/01/12 :

Reprint of the above book is available in NCBH. With different coverpage. Price-Rs 60/-. For more details see here.

ராஜராஜன் சோழன் சித்திரக்கதை பற்றி தினமணி

2010-09-27T21:54:00.000+05:30

இந்த வார தினமணி - கொண்டாட்டம் இணைப்பு ராஜராஜன் சோழன் சிறப்பு இதழாக மலர்ந்து இருந்தது. அதில் "இராஜ கம்பீரன்" சித்திரக்கதை படைத்த ஓவியர் தங்கம் அவர்களின் பேட்டி வெளிவந்திருகிறது. அதன் ஸ்கேன் வடிவம் இதோ ....
சித்திரக்கதை எழுத்தாளர் ஒருவரின் பேட்டியை தினமணி வெளியிடுவது ஆரோக்கியமான சங்கதி.

ஓவியர் தங்கம் பேட்டி

தினமணி கொண்டாட்டம் முகப்பு பக்கம்

ஓவியர் தங்கம் அவர்களின் துணைவி சந்திரோதயம் அவர்களும் "மர்ம வீரன் ராஜராஜ சோழன்" என்ற சித்திரக்கதையை வழங்கி உள்ளதாக தெரிகிறது.
"இராஜ கம்பீரன்" சித்திரக்கதை பற்றிய பதிவினை படிக்க இங்கே கிளிக்கவும்.

மங்க்கி காமிக்ஸ் (Monkey comics)

2010-09-23T19:45:00.006+05:30

வணக்கம் நண்பர்களே... ஒரு சிறிய இடைவெளிக்கு பிறகு ஒரு பதிவு. சமீப காலமாகவே காமிக்ஸ் பதிவுலகில் பதிவுகள் குறைந்துவிட்டது போல் தெரிகிறது. கனவுகளின் காதலர் மட்டும் பின்னிஎடுக்கிறார். (ஆனால் காமிக்ஸ் பற்றிய பதிவுகள்தான் குறைவு). அதே போல் லயன் காமிக்ஸ் அலுவலகத்திலிருந்து எந்த நற்செய்தியும் வராமலிருப்பது சோர்வளிக்கிறது. கூடிய விரைவில் நற்செய்தி எதாவது வந்தால் நன்றாக இருக்கும்.

இனி பதிவிற்கு செல்வோம்...
மங்க்கி காமிக்ஸ் (இப்படியும் ஒரு பெயர்) - 1995~1999 களில் வெளிவந்த தமிழ் சித்திரக்கதை இதழ். மொத்தம் 8 ~ 10 இதழ்கள் வந்திருக்கும் என் எண்ணுகிறேன். என்னிடம் நான்கு இதழ்கள் உள்ளன.

நட்சத்திர யுத்தம்

முதல் இதழான நட்சத்திர யுத்தம் 1995 ல் வெளிவந்து இருக்கிறது. ஆசிரியரின் குறிப்பும் கொடுக்கப்பட்டு இருக்கிறது.

கழுகு மலை புதையல்
இது ஒரு இ.கோ.மு.சிங்கம் போல் இந்திய கெளபாய் கதையாகும். ராஜ்பிரசாத் என்பவர் கதை மற்றும் ஓவியங்கள் வரைந்துள்ளார். ஓவியர் மாருதியின் அட்டகாச அட்டைபடம் இதழுக்கு மிகப்பெரிய பிளஸ் பாய்ன்ட். காமிக்ஸ் உலகில் மாருதியின் படைப்புகள் மிகவும் குறைவு என்பது என் கருத்து. அட்டைப்படத்தில் இருக்கும் தரத்தை உள்ளேயும் காட்டியிருந்தால் நன்றாக இருந்திருக்கும்.
மற்றபடி புத்தகத்தின் சில பக்கங்கள் உங்கள் பார்வைக்கு.

(அட்டைபடம், ஆசிரியர் பக்கம், வாசகர் கடிதம், வள்ளியண்ணா சிறுகதை மற்றும் தொடர்கதை....)

மங்க்கி காமிக்ஸ் ஸ்பெஷல் :
கோடை காலத்தில் மங்க்கி காமிக்ஸில் இருந்து வெளிவந்த ஒரு ஸ்பெசல் புத்தகத்தின் சில பக்கங்கள்....இங்கு மாருதியின் அட்டைபடம் மிஸ்ஸிங்.
ஜட்ஜ் dredd - அட்டைபடத்தில் மட்டும்.

(போலிஸ் அக்காவின் தாடிக்காக மாஸ்டர் சிவ் வை மன்னித்துவிடுங்கள்.)
இந்த இதழின் கதைகளின் முதல் பக்கங்கள் ....

இந்த ஸ்பெஷல் இதல் ஏற்கனவே வந்திருந்த கதைகளின் மறு பதிப்பே.

பதிவை பொறுமையாக படித்தற்கு நன்றி. தங்கள் கருத்துகளையும் தகவல்களையும் நண்பர்கள் இங்கே பகிர்ந்து கொள்ளவும்.

வாதாபி கலை மடல்

2010-08-09T12:03:00.002+05:30

ஓவியர் மணியம் அவர்கள் ஒரு முறை கன்னட நாட்டிலுள்ள பாதாமி என்ற இடத்திற்கு சென்று அங்கிருந்த சிற்பங்களை ரசித்து வியந்து ஊள்ளார். மன்னர்கள் காலத்தில் இச்சிற்பங்கள் எப்படி வடிக்கப்பட்டு இருந்திருக்கும் என்ற கற்பனையை ஓவியமாக தீட்டி அன்றைய கல்கி இதழில் வெளியிட்டுள்ளார். இவ்வோவியங்களுக்கு அவர் வைத்திட்ட பெயர் 'வாதாபி மடல்'

இதே ஓவியங்களின் மறுபதிப்பை ஒரு பழைய மாத இதழில் (ஓம் சக்தி) பார்க்க நேரிட்டது. அவற்றின் ஸ்கேன்கள் அப்படியே இங்கே....

தமிழ்வாணன் - சில சித்திர துளிகள் (Tamilvannan and comics)

2010-07-22T20:41:00.004+05:30

வணக்கம் நண்பர்களே,

வீடு மாற்றம், கால்பந்து மற்றும் BSNL லின் "அற்புத" சேவை ஆகிய காரணங்களால் சிறிது நாட்களாக பதிவிட முடியவில்லை. தமிழ் எழுத்தாளர்களில் தமிழ்வாணன் அவர்கள் மிக முக்கியமானவர். மிக வித்தியாசமானவர் கூட. தமிழில் துப்பறியும் நாவல்களை பிரபலப்படுத்தியவர் இவர்தான் என கூறலாம். நாவல் உலகின் நட்சத்திரமாக விளங்கிய தமிழ்வாணன் ஒருசில சித்திரக்கதைகளையும் படைத்திருப்பதாக அறிகிறேன். இவருடைய சித்திரக்கதைகளுக்கும் சரி நாவல்களிலும் சரி ஓவியர் ராமுவின் கைவண்ணமே அதிகம் தென்படுகிறது. இதோ என் கையில் கிடைத்த தமிழ்வாணனின் சித்திரக்கதை இதழின் சில பக்கங்கள்....

சென்னையில் படித்துகொண்டிருக்கும் சிங்கப்பூர் தொழிலதிபரின் மகன் துரைவேல் கப்பல் ஒன்று மூலமாக ஊருக்கு திரும்புகிறார். கப்பல் போய்கொண்டிருக்கும் போது சிறிய புயல் ஒன்று கப்பலை தாக்குகிறது. ஆனாலும் கப்பல் எந்த பாதிப்பும் இல்லாமல் தப்புகிறது. ஆனால் புயல் ஓய்ந்தபின் துரைவேலை காணவில்லை. துரைவேல் இல்லாமலே கப்பல் சிங்கப்பூர் அடைகிறது. துரைவேல் என்ன ஆனார்?? உயிரோடு இருக்கிறாரா இல்லையா என்பதை சுவையாக சொல்லி இருக்கிறார் தமிழ்வாணன். ராமுவின் அற்புதமான சித்திரங்களில் இந்த கதை ஒரு சிறந்த தமிழ் சித்திரக்கதையாக விளங்குகிறது. கதையில் எதிர்பாராத திருப்பங்களுக்கு பஞ்சம் இல்லை. ஒரு குரங்கானது முக்கிய பாத்திரத்தில் வருகிறது. அதன் தியாக உள்ளம் மற்றும் உதவும் குணம் நெஞ்சை தொடுவதாக இருக்கிறது. தமிழில் படைக்கப்பட்ட சித்திரக்கதைகளில் முக்கிய இடம் "திரும்பி வரவில்லை" க்கு கண்டிபாக உண்டு. இந்த இதழின் அட்டைபடமும் அட்டகாசமான ஒன்று. இவ்விதழின் சில பக்கங்கள் உங்கள் பார்வைக்கு...

தமிழ்வாணனின் துப்பறியும் நாவல்கள்:

'மனசில என்ன துப்பறியும் புலி சங்கர்லால் என நினைப்போ' என்று பேச்சு வழக்கில் வரும் அளவிற்கு சங்கர்லால் புகழ் பெற்ற ஒரு துப்பறியும் கதாநாயகனாக விளங்கினார்.பழைய கல்கண்டு இதழ்களில் சங்கர்லால் எனும் பாத்திரம் உயிருடன் உலாவது போன்றே தகவல்கள் வருமாம். முதலில் சங்கர்லால் துப்பறியும் நாவல்களை எழுதிய தமிழ்வாணண் பிறகு அவரது நாவல்களில் தானே நாயகன் ஆகிகொண்டார். (தற்போதைய தமிழ் இயக்குனர்கள் போல). தனித்தனி புத்தகங்களாக வெளிவந்த சங்கர்லால் புத்தகங்கள் தற்போது மூன்று தொகுதிகளாக அட்டகாசமான வடிவமைப்பில் விற்பனைக்கு கிடைக்கிறது. பழைய சில புத்தகங்களில் சில இன்னும் தனி நாவலாக கிடைக்கிறது. அவற்றில் சிலவற்றின் அட்டைபடங்கள்..

தமிழ்வாணன் எழுதிய பல நாவல்கள் கல்கண்டு புத்தகத்தில் தொடராக வந்தவையே.. அத்தகைய தொடர்களில் ஓவியர் ராமுவின் கைவண்ணங்கள்...

கனவுகளின் காதலர் சீறிபாயும் கார்கள் பற்றி கூறியிருந்தார். பழைய கல்கண்டு புத்தகங்களை புரட்டி பார்த்ததில் ஓவியர் ராமுவின் கைவன்ணத்தில் நிறையவே கார்கள் சீறுகின்றன. சில படங்கள்..

AMIT என்ற காமிக்ஸ் இதழில் சங்கர்லால் கதைகள் சித்திரக்கதைகளாக மாற்றம் செய்யப்பட்டு வெளியிடப்பட்டன. இங்கே இருக்கும் இதழ்கள் தவிற வேறு சில சங்கர்லால் சித்திரக்கதைகளும் வெளியிடப்படிருப்பதாக நண்பர் விஸ்வா ஒருமுறை கூறினார்.

பின்குறிப்பு : இது திரு தமிழ்வாணன் பற்றிய முழு தகவல் களஞ்சியம் அல்ல. என்னிடம் இருக்கும் தமிழ்வாண்னின் படைப்புகளை பகிர்ந்து கொள்ளும் ஒரு முயற்சியே. தமிழ்வாணனின் சித்திரக்கதை முயற்சிகள் பற்றி வேறு தகவல்கள் இருப்பின் பின்னூட்டம் மூலம் நண்பர்கள் பகிர்ந்து கொள்ளலாம்.

சமூக விழிப்புணர்ச்சியில் சித்திரக்கதைகள்

2010-05-02T13:31:00.003+05:30

வருமுன்னர்க் காவாதான் வாழ்க்கை எரிமுன்னர்
வைத்தூறு போலக் கெடும். ( குறள் எண் : 435 )
(குற்றம் நேர்வதற்கு முன்னமே வராமல் காத்துக் கொள்ளாதவனுடைய வாழ்க்கை, நெருப்பின் முன் நின்ற வைக்கோல் போர் போல் அழிந்துவிடும்)

ஏமாறுகிறவன் இருக்கிறவரை ஏமாற்றுபவன் இருப்பான் என்பது பொதுமொழி. ஏமாறாமல் இருக்க எப்படி ஏமாற்றுகிறார்கள் என்பதை தெரிந்திருக்க வேண்டும். அதற்காக நாம் ஏமாற்று பேர்வளிகளுடன் கூட்டு வைத்துகொள்ள தேவையில்லை. காமிக்ஸ் படித்தாலே போதும். ஆம் மோசடி மன்னர்கள் வாழும் இந்த சமுதாயத்தில் மோசடிகள் எப்படியெல்லாம் நடக்கிறது என்பதை தெரிந்துகொள்வது விழிப்புணர்ச்சி ஆகும். இந்த விழிப்புண்ர்ச்சியை நாம் சிறுவர்களாக இருக்கும் போது நாம் படித்த காமிக்ஸ்கள் சிறப்பாக செய்திருக்கின்றன என்பது என் கருத்து. எண்ணிலடங்கா காமிக்ஸ்கள் இந்த பணியை செய்திருந்தாலும் ஒரு சில காமிக்ஸ்கள் மனதில் பளிச்சென்று வருகின்றன.

1. பனியில் ஒரு பிணம்:

மனிதர்கள் அனைவருக்கும் வாழ்க்கை துணை என்பது மிகவும் அவசியம் தான். ஆனால் பொருத்தமான துணை அவ்வளவு எளிதாக சிலருக்கு கிடைப்பதில்லை. அதிலும் குறிப்பாக தோற்றகவர்ச்சி குறைவாக இருக்கும் பெண்களுக்கு வாழ்க்கைதுணை அமைவது பெரும் சவாலாகவே அனைத்து நாடுகளிலும் உள்ளது. இந்த வாய்ப்பை பயன்படுத்தி கிராமத்து பெண்களை ஏமாற்றி முடிந்தளவு பணத்தை கறந்துவிட்டு அப்பாவி பெண்களை கொலையும் செய்யும் ஒரு கீழ்தரமானவனின் கதையே பனியில் ஒரு பிணம்.

ராபினின் அறிமுக சாகசமான இந்த கதை காதல் என்ற பெயரில் செய்யப்படும் மோசடிகளை தோலுரித்து காட்டுகிறது. அட்டகாசமான அட்டைபடத்துடன் வெளிவந்த இந்த காமிக்ஸ் எப்போதும் எனக்கு பிடித்த ஒன்றாகும். நம்நாட்டில் மட்டுமல்ல அமெரிக்காவிலும் வீட்டைவிட்டு ஓடிபோவது என்பதை மானபிரச்சனையாகவே கருதுகிறார்கள் என்பது ஆச்சரியம்.

விஜயன் சாரின் அற்புதமான தமிழ்நடை இந்த கதைக்கு இன்னும் சிறப்பு சேர்க்கிறது.

2. சிவப்பு தலை சாகஸம்.
எந்த ஊரிலும் ஆதாயம் இல்லாமல் ஓசியில் எதுவுமே தரமாட்டார்கள் என்பது Golden rule. அதை புரிந்து கொள்ளாமல் அற்ப வேலைக்கு அதிக பணம் தருகிறார்கள் என தன் சொந்த கடையை மொள்ளமாரி பயல் ஒருவனின் பொறுப்பில் விட்டு விட்டு 'செம்பட்டை முடியுடையோர்' சங்கத்தில் வேலைக்கு சேர்கிறார் வில்ஸன். இதன் மூலம் ஒரு வங்கி கொள்ளைக்கு தன்னை அறியாமல் துணைபோகிறார். ஷர்லக் ஹோம்ஸின் வித்தியாசமான கதை.

(இங்கு சிவப்பு தலை என்பது தல அஜித்தை குறிக்கவில்லை.)

3. பரலோக பரிசு.
கள்ள நோட்டு பற்றி உஷாராக இருக்கும் நாம் போலி பத்திரங்கள் பற்றி பெரிதாக அலட்டிக்கொள்வதில்லை. அதிலும் இந்த கதையில் போலி பத்திரங்களை மக்களிடையே உலாவ விடும் தந்திரம் (பரிசு போட்டி) அபாரம் மற்றும் யாரும் எதிர்பார்க்காதது.

(ஸ்கேன் உதவி - TCU)

4. வேங்கை வேட்டை
இந்திய மன்னன் என்று சொல்லிக்கொண்டு பங்கு வர்த்தகம் நடத்தும் ஏமாற்று பேர்வழியின் பகட்டான தோற்றத்தையும் கவர்ச்சிகரமான திட்டத்தையும் பார்த்து ஏமாறுகிறார்கள் மக்கள். அந்த மோசடி மன்னனின் உண்மை முகத்தை ரிப் வெளிகொண்டுவருகிறார்.

ஏமாறும் மக்கள்

ஏமாறும் பெண்கள்

மன்னனின் உண்மை முகம்

5. மேடையில் ஒரு மன்மதன்
கடமை முதலில் களிப்பு பிறகு என்பதை இங்கு சிலர் மறந்து விடுகிறார்கள். நாடகம் என்ற பெயரில் ஊரில் இருக்கும் அனைத்து மக்களையும் ஒரே இடத்தில் கூட வைத்து வங்கியை கொள்ளை அடிக்கும் கும்பலின் கதை.

6. நடுநிசி பயங்கரம்
முன்பின் தெரியாவனுடன் பார்ட்டியில் நடனம் ஆடுவதே தவறு. அதுமட்டுமில்லாமல் அவனது இருப்பிடத்திற்கும் சென்று வம்பை விலைக்கு வாங்கும் ஒரு பெண்ணின் கதை.

7. மாயாஜால மோசடி
வெறும் மனதை வைத்துக்கொண்டு அனைத்தும் அடையலாம் என்று கூறும் ஒருவன் மீது நமது மக்களுக்கு உடனே பக்தி வந்துவிடுகிறது. உழைப்பு இல்லாமல் எதையும் அடைய முடியாது என்ற உண்மையை மறந்து விட்டு நேரத்தையும் செல்வத்தையும் ஏமாற்று பேர்வழிகளிடம் அடகு வைக்கிறார்கள். இந்த கதையை முழுமை உணர்ந்து படித்த எவறும் நித்தியானந்தா போன்றவர்களை கண்டிப்பாக நாடி இருக்க மாட்டார்கள் என்பது என் ஊகம். நகைச்சுவையான ரிப் சாகஸம்

8. போலி சாமியார்
போலி சாமியார்களிடம் அப்பாவி மக்கள் மட்டுமெ ஏமாறுவார்கள் என்றில்லை. திருடர்களும் பேராசைபட்டு ஏமாறுகிறார்கள். இந்த கதையிலும் மோசடி ஆள் இந்தியாவின் பெயரையே உபயோகப்படுத்துகிறான். மாடஸ்டியின் சூப்பர் சாகஸம் மொக்கை மொழிபெயர்ப்பில்.

காமிக்ஸ் படிப்பதால் நிறைய மோசடிகளை பற்றி தெரிந்துகொள்கிறோம். ஆகையால் சிறுவர்களுக்கு காமிக்ஸ் படிப்பதை ஊக்குவிப்போம் நண்பர்களே.

குறிப்பு 1: மேலிருக்கும் கதைகளில் பெரும்பாலான கதைகளில் பெண்களே ஏமாற்றப்படுகிறார்கள். இதிலிருந்து எனக்கு எழும் கேள்வி

"பெண்களை ஏமாற்றுவது சுலபமா அல்லது ஏமாற்றும் ஆசாமிகளை பெண்களுக்கு ரொம்ப பிடிக்கிறதா?"

இந்த சந்தேகத்தை தீர்த்து வைப்போர்க்கு சுவாமி குத்தானந்தாவின் ஆசி பெற்ற ஆயிரம் போலி பொற்காசுகள் வழங்கப்படும் என்பதை தெரிவித்து கொள்கிறேன்.

எங்கோ பார்த்த ஞாபகம்

2010-04-18T21:41:00.002+05:30

1997 ல் வெளிவந்த மேகலா காமிக்ஸின் அட்டைபடம்

இன்று வெளிவந்த தினத்தந்தி - குடும்பமலரின் "பூவில் ஒரு சூறாவளி" தொடர்கதைக்கான ஓவியம்

மேகலா காமிக்ஸின் ஓவியம் யார் வரைந்தது என தெரியவில்லை. குடும்ப மலர் ஓவியம் ஸ்யாம் வரைந்தது. மேகலா காமிக்ஸின் ஓவியம் கூட ஸ்யாமின் ஓவிய பாணியில் தான் இருக்கிறது. அவரே அந்த அட்டைபடம் வரைந்திருபதற்கான சாத்தியங்கள் அதிகம்

குறிப்பு : இன்றைய குடும்பமலர் பார்த்தவுடன் ஞாபகம் வந்ததால் இந்த பதிவு.

பூவிழி காமிக்ஸ் (Poovili comics & bright moon comics)

2010-04-15T21:18:00.011+05:30

தமிழ்நாட்டில் எப்போதும் ஏப்ரல்~ஜூன் மாதங்களில் காமிக்ஸ் விற்பனை அதிகமாக இருக்கும். இந்த சமயத்தில் மட்டுமே வெளிவக்கூடிய காமிக்ஸ் பத்திரிக்கைகள் சில உண்டு. அவற்றில் ஒன்றுதான் பூவிழி பப்ளிக்கேஷன்ஸ். மதுரையில் இருக்கும் இவர்களுடைய நிறுவனத்திலிருந்து 'பூவிழி காமிக்ஸ்' மற்றும் 'பிரைட் மூன் காமிக்ஸ்' என இரண்டு காமிக்ஸ்கள் வெளிவந்தன. இவை வெளிவந்த ஆண்டு 1996 லிருந்து 1999 வரை. மொத்தம் வெளிவந்த காமிக்ஸ்களின் எண்ணிக்கை சரியாக தெரியவில்லை. கண்ணால் பார்த்த காமிக்ஸ்களை வைத்து பார்க்கும் போது குறைந்தபட்சம் பூவிழி காமிக்ஸில் 10 புத்தகங்களும் பிரைட் மூன் காமிக்ஸில் 3 புத்த்கங்களும் வந்திருக்க வேண்டும். M. உதயகுமார் என்பவரை ஆசிரியராக கொண்டு இந்த இதழ்கள் வெளிவந்திருக்கிறது. எம். ஐஸ்வர்யா மற்றும் ஸ்ரீகாந்த் ஆகியோர் கதைகளை படைத்திருக்கிறார்கள். இதில் ஸ்ரீகாந்த் அவர்களின் படைப்புகளை மலர் காமிக்ஸ் மற்றும் தேசமலர் காமிக்ஸில் நீங்கள் படித்திருக்ககூடும். (இவரின் படைப்புகள் பற்றிய ஒரு பதிவை விரைவில் இடலாம் என இருக்கிறேன்). இறுதி இதழ்கள் அனைத்தும் எதாவது ஒரு ஆங்கில படத்தை மூலமாக கொண்டு உருவாக்கப்பட்டிருக்கிறது.

நிறுவனம் - பூவிழி பப்ளிக்கேஷன்ஸ், மதுரை
ஆசிரியர் - M. உதயகுமார்
பக்கங்கள் - 48
விலை - ரூ 4
ஆண்டு - 1996 லிருந்து 1999 வரை (தோராயமாக)
எண்ணிக்கை - 13 (தோராயமாக)

இனி சில காமிக்ஸ்களின் அட்டைபடங்கள் மற்றும் சில பக்கங்கள்

1. வேட்டையாடும் பிசாசு - ஸ்ரீகாந்த்

2. மோகினித்தீவு - ஐஸ்வர்யா

3. விண்வெளி அரக்கன் - ஐஸ்வர்யா

(இங்கு அட்டைபடத்தில் கதை தலைப்பு மட்டும் தனியாக ஒட்டப்பட்டிருக்கிறது. பூவிழி காமிக்ஸின் லோகோவும் மாறி உள்ளது)

4. பூத சுரங்கம் - ஐஸ்வர்யா

(இங்கும் அட்டைபடத்தில் கதை தலைப்பு மட்டும் தனியாக ஒட்டப்பட்டிருக்கிறது)

5. டினோசர் பயங்கரம் - ஸ்ரீகாந்த்

(ஜூராசிக் வேல்டு திரைப்படத்தை தழுவிய கதை)

6. எரிந்த மனிதன் - ஐஸ்வர்யா

இந்த இதழில் ஸ்ரீகாந்த் உருவாக்கிய 'சிங்கரதம்' என்ற 32 பக்க வரலாற்று கதையும் இடம் பெற்று இருக்கிறது

7. பறவை மனிதன் - ஐஸ்வர்யா

(இந்த கதை கிட்டதட்ட பேட்மேன் கதை போலவே உள்ளது)

இரத்தப்பேய் - ஐஸ்வர்யா

(இந்த இதழில் நமது காக்கை காளியை தழுவிய ஒரு சித்திர சிறு கதையும் இடம் பெற்றுள்ளது.

இனி பிரைட் மூன் காமிக்ஸ் பற்றி பாப்போம். காமிக்ஸ் பெயரை தவிர பூவிழி காமிக்ஸ்க்கும் பிரைட் மூன் காமிக்ஸ்க்கும் பெரிய வித்தியாசம் ஏதும் இல்லை. இதில் தான் நீங்கள் ஆவலுடன் எதிர்பார்க்கும் கிங்காங் சித்திரக்கதை வெளியிடப்பட்டிருக்கிறது. எண்ணிக்கையில் குறைவாகவே வெளிவந்துள்ளதாக தெரிகிறது.

1. பேய் சொல்லைத் தட்டாதே - ஐஸ்வர்யா

2. கல்லறைக் காவலன் - ஐஸ்வர்யா

கிங் காங் - ஐஸ்வர்யா

இந்த இதழின் அட்டைபடத்தை பார்த்த சில்ர் இந்த கதை அடுக்குமொழி புகழ் தமிழ் நடிகர் பற்றிய கதையா என விசாரித்தனர். அப்படியெல்லாம் இல்லை நண்பர்களே. இந்த கதை அப்படியே ஆங்கில படத்தின் காமிக்ஸ் வடிவமே ஆகும். இங்கும் ஒரு காட்டு குரங்கு சூப்பர் பிகர் ஓன்றை கரைட் செய்து அலம்பல் செய்கிறது. கதையின் கிளைமாக்ஸ் தான் நாம் யாருமே எதிர்பார்க்காத முடிவு. இந்த இதழ் வெளிவந்த ஆண்டு 1998. இந்த இதழில் ஸ்ரீகாந்த் எழுதிய தூங்காத துப்பாக்கி எனும் 32 பக்க கதையும் இடம் பெற்றுள்ளது.

மேற்கண்ட இதழ்களின் தரம் பற்றி நீங்களே ஓரிரு பக்கங்கள் படித்து தெரிந்துகொள்ளலாம். ஆனாலும் தமிழில் அவர்கள் மேற்கொண்ட முயற்சிக்கு நாம் நன்றி கூறியே ஆக வேண்டும்.

வண்ணமையமான அட்டைப்படங்களும் சிறபாக உள்ளன. பள்ளி படிக்கும் போது இந்த இதழ்களை வாங்க தூண்டியதே வண்ணமையமான அட்டைபடங்களே.

இதழ்களின் விற்பனை தமிழ்நாடு முழுவதும் மேற்கொண்டதாக தெரியவில்லை.

இந்த இதழ்களை பற்றி நண்பர்கள் ஏதேனும் தகவல்கள் இருந்தாலும் பகிர்ந்து கொள்ள அழைக்கிறேன்.

(பி-கு) சி.ஐ.டி சிங்காரம் பதிவு கூடுதல் தகவல்களுடன் அப்டேட் செய்யப்பட்டுள்ளது. படிக்க இங்கே கிளிக் செய்யவும்.

தாமதமானாலும் விஸ்வா அவர்களுக்கு பிறந்த நாள் வாழ்த்துக்கள்

பதிவை படித்துவிட்டு கருத்துகளை பகிர்ந்து கொள்ளுங்கள் நண்பர்களே

இன்றைய தமிழ் பத்திரிக்கைகளில் காமிக்ஸ் - ஒரு ரவுண்ட் அப்

2010-03-20T20:01:00.006+05:30

சமீப காலங்களில் தமிழ் வெகுஜன பத்திரிக்கைகள் சித்திரக்கதைளுக்கு முக்கியத்துவம் எதும் கொடுப்பது இல்லை என்பது நாம் அனைவரும் அறிந்ததே. எனினும் தமிழின் முக்கியமான பத்திரிக்கைகளில் காமிக்ஸ்கான இடங்கள் பற்றி பார்த்தால் என்ன என்று தோன்றியது. அதன் விளைவே இந்த பதிவு.

குமுதம்:

தமிழ் பத்திரிக்கை உலகின் ஜாம்பவான்கள் என்று நம்பப்படும் ஆனந்த விகடன் மற்றும் குமுதம் இதழ்களில் சித்திரக்கதைகளுக்கான இடம் மிகவும் குறுகியது தான். காமிக்ஸ் வடிவம் என்பது நகைச்சுவை துணுக்குகளுடன் நின்றுவிடுகிறது. குமுதத்தில் ஓவியர் பாலாவின் கார்டூன்கள் மிகவும் கலக்கலாக இருக்கிறது. தனி கார்டூன்கள் 'அடடே மதி' மாதிரியான ஸ்டைலில் இருக்கிறது. நமது அரசியல்வாதிகளின் முகங்கள் இவரது தூரிகையில் படாதபாடுகிறது. குறிப்பாக கலைஞர் அவரகளை வரைய ஸ்பெஷல் பயிற்சி எடுத்திருப்பார் போல. பல விதமான முக பாவனைகளில் பிரமாதப்படுத்துகிறார். தலையங்க கார்டூன் இல்லாமல் நான்கு பக்க நய்யாண்டி சித்திரக்கதை ஒன்றும் வாரவாரம் இடம் பெறுகிறது. தற்போது ஒரு சாமியாரும் அவரது சிஷ்யரும் அரசியல் நிகழ்வுகளை கலாய்கிறார்கள். கொஞ்சம் நாட்களுக்கு முன்பு வரை செந்தில்-கவுண்ட்மணி வைத்து இந்த நய்யாண்டி சித்திரக்கதை ஓடும். இங்கும் செந்திலை பார்த்தாலே சிரிப்பை வரவழைக்கும் ஓவியங்கள்தான் ஹை-லைட். ஓவியர் பாலாவின் சித்திரங்கள் காமிக்ஸ் வடிவத்திற்கு நன்கு பொருந்துகிறது. ஏதேனும் முழுநீள சித்திரக்கதைக்கு அவர் ஓவியம் வரைந்தால் நிச்சியம் ஹிட் தான். மற்றபடி குமுததில் சித்திரங்களுக்கான இடம் ரொம்ப குறைந்துவிட்டது.

(இந்த சாக்கில் தமிழ் காமிக்ஸ் வலைபக்கங்களில் முதன்முறையாக சுவாமி நித்தியானந்தா பற்றிய சித்திரக்கதை வெளியிடப்பட்டு உள்ளது.)

ஆனந்த விகடன்:

நகைச்சுவை துணுக்குகளுக்கு புகழ்பெற்ற விகடனில் இன்னமும் நிறைய நகைச்சுவை துணுக்குகள் வெளியிடப்படுகிறது. அதிலும் பொக்கிஷம் பகுதியில் வரும் நகைச்சுவை துணுக்குகள் நன்றாக இருக்கிறது. இங்கு காமிக்ஸ் வடிவில் இருக்கும் ஒரே பகுதி நய்யாண்டி சித்திரக்கதை தான் (ஓவியர் - கண்ணா). இங்கும் இந்த வாரம் சுவாமி நித்தியானந்தா ஸ்பெஷல் தான். மதனின் ஓவியங்கள் ஆங்காங்கே தென்படுகிறது. விகடனில் தொடர்கதை மற்றும் சிறுகதைகளுக்கான சித்திரங்கள் முக்கியத்துவம் கொடுக்கப்பட்டு வெளியிடப்படுகிறது. ஸ்யாம், அரஸ் போன்றவர்களின் கைவண்ணம்

செய்திதாள்கள்

தினத்தந்தி:

தினத்தந்தி - சித்திரக்கதை - சிந்துபாத். இக்கதை பற்றி அய்யபாளைத்தாரின் தளத்தில் முழு விபரங்களையும் அறிந்து கொள்ளலாம். தினத்தந்தி இலவச இணைப்பில் சிறுகதை மற்றும் தொடர்கதைகளுக்கு சிறப்பான ஓவியங்கள் தென்படுகின்றன. பொதுவாக தினமணி, தினமலர் மற்றும் தினகரன் ஆகிய பத்திரிக்கைகளின் சிறுகதை மற்றும் தொடர்கதைகளுக்கு ஓவியங்கள் நன்றாக இருக்கிறது. தினத்தந்தி - தங்கமலரரில் மூன்று சித்திரக்கதை தொடர்கள் வெளிவருகிறது. இதில் இரண்டு தொடர்கள் Tinkle தமிழாக்கம் என்று எண்ணுகிறேன்.

தங்கமலர் சித்திரக்கதைகள்

தினமணி:

தினமணியில் வெளிவரும் அடடே மதி எப்போதும் என் all time favorite ஆகும். தினமணி - சிறுவர் மணி இதழும் சித்திரக்கதைகளுக்கு சிறப்பான பங்களிப்பை செய்து வருக்கிறது. 5 சித்திரக்கதைகளை வெளியிடும் சிறுவர்மணியில் 32 பக்கங்களில் 16 பக்கங்கள் சித்திரக்கதைகளால் நிரம்பி உள்ளது. இதில் அறிவியல் அறிஞர்கள் பற்றிய ஒரு அருமையான சித்திரத்தொடரரும் அடங்கும். (கதை, சித்திரம் - காலெப்). அலிபாபா +40 சித்திரத்தொடரும் சிறப்பான சித்திரம் மற்றும் கதையமைப்புடன் வெளிவருகிறது. (கதை, சித்திரம் - விஷ்னு)

சிறுவர்மணி சித்திரக்கதைகள்

தினமலர் - சிறுவர்மலர்:

இரண்டு சித்திரக்கதை தொடர்கள் இடம் பெற்றுள்ளது. ACK தமிழாக்கம் போல் தெரிகிறது.

காலைக் கதிர்:
தினமலர் பத்திரிக்கையின் நகல் போல் வெளிவரும் காலைக்கதிர் நாளிதழில் தினசரி காமிக்ஸ் தொடர்கதை வெளியிடப்படுகிறது. தற்போது தெனாலிராமன் பற்றிய காமிக்ஸ் தொடர்கதை வந்து கொண்டு இருக்கிறது. காலைக்கதிரின் சிறுவர் இணைப்பிலும் சில சித்திரக்க்தைகள் வெளிவருகின்றன. இவையும் தினமலர் பாணியிலேயே உள்ளன. (ஸ்கேன்கள் வரைவில்)

ஆன்மீகப்பத்திரிககைகளான சக்தி விகடன் மற்றும் ஸ்ரீ ராமகிருஷ்ண விஜயம் ஆகிய பத்திரிக்கைகளிலும் சித்திரக்கதை தொடர் வெளிவருகிறது. ஸ்ரீ ராமகிருஷ்ண விஜயமில் வரும் சித்திரக்கதைகள் கதைமலரில் வெளிவரும் கதைகளின் மூலம் ஆகும்.

ஸ்ரீ ராமகிருஷ்ண விஜயம் - கதை1

ஸ்ரீ ராமகிருஷ்ண விஜயம் - கதை2

வாரபத்திரிக்கைகளில் வரும் தொடர்கதை சித்திரங்களில் ஒரு சில உங்கள் பார்வைக்கு.... (வரிசை - 1,2 - விகடன், 3 - குடும்ப மலர், 4 - குங்குமம்)

வயாகரா தாத்தாவிற்காக 'குடும்ப' பத்திரிக்கையான குமுதத்தில் வெளிவந்த ஒரு படம். இதுவும் காமிக்ஸ் வடிவம் தானே.. (இதற்கு வசனம் எழுதிய 'இலக்கியவாதி' யாரென்று தெரியவில்லை)

பல சித்திரக்கதைகளை தமிழ் மொழிக்கு தந்த கல்கி வார இதழில் தற்போது எந்த சித்திரக்கதையும் வருவதில்லை என்பதுதான் சோகம்.

சத்தி விகடனில் வெளிவந்த சித்திரக்கதைகள் பற்றி ஏற்கனவே ஒரு பதிவில் பார்த்திருந்தோம். தற்கால கோகுலம், சுட்டி போன்ற சிறுவர் பத்திரிக்கைளில் வரும் காமிக்ஸ் பற்றி வேறு ஒரு பதிவில் பார்ப்போம்

உங்களுக்கு தோன்றும் கருத்துகளை தெரிவித்துவிடுங்களேன்..

சி.ஐ.டி சிங்காரம் IN டயல் ஒன் நாட் நாட் (CID Singaram)

2010-03-05T20:11:00.006+05:30

சி.ஐ.டி சிங்காரம் - ஒரு அறிமுகம்

வாண்டுமாமா படைத்த பல கதாபாத்திரங்களில் என்னை கவர்ந்த ஒரு கதாபாத்திரம் சி.ஐ.டி சிங்காரம் ஆகும். மேலைநாடுகளின் ஷர்லக் ஹோம்ஸ் போன்ற துப்பறியும் கதாபாத்திரங்கள் அழியா புகழுடன் விளங்குவதற்கு காரணம் கதைகளின் விறுவிறுப்பும் சஸ்பென்ஸுமே ஆகும். அத்தகைய ஒரு கதாபாத்திரம் தமிழில் இல்லை என்று வருத்தபடுபவர்கள் வாண்டுமாமாவின் சி.ஐ.டி சிங்காரம் கதைகளை படிக்கலாம். மேலை நாட்டு துப்பறியும் கதைகளில் இருக்கும் அனைத்து விஷயங்களை உள்ளடக்கி அருமையக இந்த கதாபாத்திரத்தை வடிவமைத்து உள்ளார் வாண்டுமாமா. ஒன்று மட்டும் எனக்கு நிச்சியமாய் தெரியவில்லை. ஜெய்சங்கர் இந்த கதாபாத்திரத்தை பார்த்து தனது படங்களுக்கு பெயர் வைத்தாரா அல்லது ஜெய்சங்கர் பார்த்து வாண்டுமாமா இந்த பெயர் வைத்தாரா என்பது தெரியவில்லை. எப்படி இருப்பினும் நமது பேச்சுவழக்கில் சி.ஐ.டி சிங்காரம் மற்றும் சி.ஐ.டி சங்கர் போன்ற பெயர்கள் வழக்கமான ஒன்றாக போய்விட்டது. (C.I.D - Criminal Investigation Department)

பார்வதி சித்திரக்கதை இதழின் 12வது இதழாக வெளியிடப்பட்டது டயல் ஒன் நாட் நாட் (Dial 100). 12 சிறுகதைகள் உள்ளடக்கிய இந்த தொகுப்பில் அனைத்து கதைகளின் வடிவமும் ஒன்றே. சென்னையில் நடக்கும் சிறு சிறு குற்றங்களை சிங்காரம் விசாரித்து சரியான குற்றவாளியை பிடிப்பதே அனைத்து கதைகளின் பொதுவான வடிவம். இந்த சாதாரண கதையமைப்பில் வாண்டுமாமா புகுத்திய புதுமை(தமிழில்) வாசகர்களின் மூளைக்கு வேலை கொடுப்பது. கதையில் ஆங்காங்கே சில வினாக்கள் கொடுக்கப்பட்டிருக்கும். நாம் சிறிது யோசித்து விடைகளை யூகிக்க வேண்டும். இந்த யுத்தியால் சதாரண கதை கூட விறுவிறுபடைகிறது. லயன் வாசகர்களுக்கு இந்த யுத்தி 'ஜார்ஜ் நோலன்' மற்றும் இன்ஸ்பெக்டர் ஒருவர் (ட்ரேக்?? பெயர் மறந்து விட்டது) மூலம் ஏற்கனவே பழக்கம் தான் இருந்தாலும் தமிழ் படைப்பில் இத்தகைய விஷயத்தை பார்ப்பது ஒரு புது அனுபவமாக இருக்கிறது. உதாரணத்திற்கு ஒரு கதை உங்கள் பார்வைக்கு...

காமிக்ஸ் கதைகளில் லாஜிக் என்பது அவ்வளவாக தேவையில்லை எனினும் துப்பறியும் கதைகளுக்கு ரொம்ப முக்கியம். இந்த கதைகளில் லாஜிக் ஓட்டைகள் மிக மிக குறைவு. ஆனால் இவ்வளவு புகழ் பெற்ற சி.ஐ.டி ஏன் ஜேப்படி திருடர்கள் போன்றவர்களையே வளைத்து வளைத்து பிடிக்கிறார் என்பது தான் புரியவில்லை. 'லம்ப்'பாக எதையாவது பிடிக்க வேண்டாமா. ஷர்லக் ஹோம்ஸ் கதைகளில் வாட்ஸன் போல பாலு எனற உதவியாளர் உள்ளார். இவர் சும்மா பேச்சுதுணைக்கு மட்டும் தான் போல. வேறு எதுவும் உருப்படியாக செய்வதாக தெரியவில்லை. எப்பிடி இருப்பினும் தமிழ் சித்திரக்கதைகளில் ஒரு வித்தியாசமான, சுவையான மற்றும் தரமான ஒரு கதையை கொடுத்த வாண்டுமாமாவிற்கு நன்றிகள். வழக்கமாக ஒருவர் 60 பக்க காமிக்ஸ் கதையை 60 நிமிடங்களில் படித்தால் இந்த கதையை படிக்க கண்டிப்பாக 80 நிமிடங்களாவது ஆகும். காரணம் வாண்டுமாமா உங்கள் மூளைக்கு வேலை கொடுப்பதுதான்.

ரமணி

இந்த கதைக்கு ஓவியம் ரமணி. இதுபோன்ற துப்பறியும் கதைக்கு நுணுக்கமான ஓவியங்கள் மிக அவசியம். அதை சிறப்பாக செய்திருக்கிறார் ரமணி. சிறு சிறு விஷயங்களை கூட தெளிவாக வரைந்துள்ளார். வாண்டுமாமா - செல்லம் கூட்டணிக்கு இனையான கூட்டணி வாண்டுமாமா - ரமணி கூட்டணியாகும். எழுத்துகளும் மிக அழகாக இருக்கிறது. ரமணி பற்றிய மேலும் தகவல்களுக்கு இங்கே சொடுக்கவும். அட்டைபடம் சுப்பு எனபவரால் வரையப்பட்டிருகிறது.

சி.ஐ.டி சிங்காரம் கதைகள் எழுத்து கதை வடிவில் பூந்தளிர் இதழில் வந்துள்ளது. இதே கதைகளை வானதி பதிப்பகம் முழு புத்தகமாக வெளியிட்டுள்ளது. இந்த புத்தகங்களில் சித்திரங்கள் இல்லாதது பெறும் குறை. நண்பர் விஸ்வா சி.ஐ.டி சிங்காரமின் கல்கி இதழ் அவதாரம் பற்றி தனது பதிவில் கூறி உள்ளார்.

வாண்டுமாமா வேறுசில துப்பறியும் கதாநாயகர்களையும் உருவாகியுள்ளார். அதை பற்றி பின்னொரு பதிவில் பார்ப்போம்.

பின்குறிப்பு :

1. கூடுதல் தகவல்களுடன் அமுத நிலையத்தின் புராண சித்திரக்கதைகள் பதிவு update செய்யப்பட்டுளது. படிக்க இங்கே சொடுக்கவும்

பதிவு பற்றிய உங்களுடைய கருத்துகளை கண்டிப்பாக தெரிவிக்கவும்

ஆனந்த விகடனும் தமிழின் முதல் சித்திரக்கதையும் (Comics in Ananda vikatan)

2010-02-13T22:07:00.001+05:30

வணக்கம் காமிக்ஸ் நண்பர்களே,

10/15 வருடங்களுக்கு முன்பு வரை தமிழகத்தின் அனைத்து முன்னனி வாரபத்திரிக்கைகளிலும் ஒரு சித்திர தொடர்கதையாவது கண்டிப்பாக இடம்பெற்று இருக்கும். பழைய கல்கி, ஆனந்தவிகடன், குமுதம் இதழ்களை நீங்கள் பார்க்க நேரிட்டால் இதை உணரக்கூடும். இந்த வகையில் கல்கியில் வாண்டுமாமா படைத்த பல சித்திரக்கதைகள் தமிழ் சித்திரக்கதை உலகின் முத்துக்கள். யாருடைய சதி என்று தெரியவில்லை இன்று கண்ணுக்கு எட்டியவரை வாரபத்திரிக்கைகளில் சித்திர தொடர்கதை எதுவும் தென்படவில்லை

இந்த பதிவில் ஆனந்த விகடன் இதழ்களில் வெளிவந்த சில படக்கதைகள் பற்றி பார்ப்போம். இந்த பதிவு ஆனந்த விகடனின் காமிக்ஸ் சேவை பற்றிய முழு வரலாறு கிடையாது என்பதையும் எனக்கு தெரிந்த சில தகவல்களை பகிர்ந்து கொள்ளும் முயற்சியே என்பதையும் இப்போதே சொல்லிவிடுகிறேன்.
இந்த வார ஆனந்த விகடன் இதழில் தமிழின் முதல் படக்கதை பற்றிய செய்தி துணுக்கு ஒன்று 'பொக்கிஷம்' பகுதியில் வெளியிட்டு உள்ளது.

(தமிழின் முதல் படக்கதை பற்றி ஆ.வி வெளியிட்டிருக்கும் தகவல்கள், தலைப்பு - ஜமீந்தார் மகன், கதை - முத்து, ஓவியம் - மாயா, ஆண்டு - 1956)

ஆனந்த விகடன் பெரும்பாலும் பெரியவர்களை கவரும் விதமான சித்திரக்கதைகளுக்கே முன்னுரிமை கொடுத்துள்ளார்கள் என்பது என் கணிப்பு. ஆனால் கல்கியோ சிறுவர்களை கவரும் சித்திரக்கதைகளுக்கு முன்னுரிமை கொடுத்துள்ளார்கள்.

1970 களில் வெளிவந்த சில சித்திரக்கதை தொடர்களின் ஸ்கேன்கள் உங்கள் பார்வைக்கு. இங்கு இரண்டாவதாக பார்க்கும் 'பொன்மகள் பூமா' தமிழின் முதல் சித்திரக்கதையின் ஓவியர் மாயாவின் கைவண்ணம்.

பொன்னின் நிழல்

பொன்மகள் பூமா

ஸ்வீட் செவண்டீன் (முதல் வாரம் மட்டும் இருவண்ணம்)

சராசரியாக ஒரு கதை 20~25 வாரங்களுக்கு வெளிவந்திருக்கிறது. பெரும்பாலான கதைகள் 1960 களின் சினிமாக்களை நியாபகப்படுத்துகிறது. குறை சொல்ல முடியாத சித்திர தரம் மற்றும் எளிமையான கதை அமைப்பும் இக்கதைகளின் சிறப்பு அம்சங்கள்.
1980களில் வந்த 'தசாவதாரம்' சித்திரக்கதை சமீபத்தில் பொக்கிஷம் பகுதில் மறுபதிப்பு செய்யப்பட்டது. கதை - புகழ்பெற்ற பேய் கதை எழுத்தாளர் பீ.டி சாமி.
ஆனந்த விகடனில் கொஞ்ச நாட்களாக சித்திரக்கதை தொடர் ஏதுவும் வருவதில்லை என்றாலும் நிறைய கார்டூன் துணுக்குகள் வருவது மகிழ்ச்சி.
ஆனால் பக்தி விகடனில் சிறிது காலமாக வாரம் ஒரு சித்திரக்கதை வெளிவந்து கொண்டிருந்தது. (தற்போது வருகிறதா என தெரியவில்லை)

வாரபத்திரிக்கைகளின் வெளிவந்த காமிக்ஸ் பற்றிய நண்பர் சாத்தானின் பதிவுகளை படிக்க.....

பதிவு1, பதிவு2

நண்பர் அய்யம்பாளையம் வெங்கடேஸ்வரனின் 1970களில் வெளிவந்த காமிக்ஸ் பற்றிய பதிவை படிக்க....

அப்புறம் இப்போது வரைக்கும் எனக்கு சம்பந்தம் இல்லாத ஒரு விஷயமாக இருந்தாலும் அனைவருக்கும் இனிய காதலர் தின வாழ்த்துக்கள்.

பொன்னியின் செல்வன் சித்திரங்கள் - சுழற் காற்று (Ponniyin selvan pictures II)

2010-01-31T07:51:00.009+05:30

பொன்னியின் செல்வன் முதல் பாகத்தின் சித்திரங்களிலான முந்தைய பதிவை அடுத்து இரண்டாம் பாகமான சுழற் காற்றின் சித்திரங்கள் இந்த பதிவு மூலம் வழங்கப்படுகிறது. முன்பு ஓவியர் வினுவின் கைவண்ணத்தை பார்த்தோம். இப்போது ஓவியர் மணியம் அவர்களின் கைவண்ணத்திலான் ஓவியங்களை பார்ப்போம். பொன்னியின் செல்வன் 1987 ல் கல்கியில் தொடர்கதையாக வந்த போது வெளிவந்த சித்திரங்கள் இவை. பைன்டிங் செய்யப்பட்ட புத்தகம் என்பதால் சில ஸ்கேன்களின் நடுவே வரும் கருப்பு கோடு தவிர்க்க முடியாததாகி விட்டது. இரண்டாம் பாகத்தின் பல சித்திரங்களில் ஒரு சில சித்திரங்கள் இங்கே உங்கள் பார்வைக்கு.

பதிவின் கடைசியில் இருக்கும் வரைபடம் பொன்னியின் செல்வன் கதை படிக்கும் போது கதையை புரிந்து கொள்ள உதவியாக இருக்கும்.

பூங்குழலியின் அழகிய தோற்றம்

வந்தியத்தேவனும் வைத்தியர் மகனும் கோடியக்கரையில் நுழையும் காட்சி

வந்தியத்தேவனும் பூங்குழலியும்

நீச்சல் தெரியாத வந்தியத்தேவனை வேடிக்கை செய்யும் பூங்குழலி

பூங்குழலியின் வீட்டில்

இராமேசுவரத்திலிருந்து அநிருத்த பிரம்மாதிராயர் தனது குழுவுடன் இலங்கை செல்லும் காட்சி

காவரித்தாய் மீட்டெடுத்த பொன்னியின் செல்வன்.

சுந்தர சோழரின் ஊமைராணி பற்றிய நினைவுகள்

இலங்கையில் மத யானை ஓடிவரும் காட்சி

யானையை துரத்த முயலும் ஆழ்வார்க்கடியான்

சீனத்து யாத்திரீகர்களின் யானை பவனி. (யானை பாகனாக பொன்னியின் செல்வன்)

இலங்கை வீதிகளில் பொன்னியின் செல்வன் வந்தியத்தேவன், ஆழ்வார்க்கடியான்

புத்த பிஷூ சங்கத்தில் இளவரசர்

பூங்குழலியும் இளவரசரும்

யானை பாகனாக இளவரசரும் பூங்குழலியும்

அரேபியர்களுடான சண்டையில் வந்தியத்தேவன்

அரேபியர்களின் கப்பலை தாக்கும் இடி

அந்த கப்பலில் மரணத்தை சந்திக்க தயாராகும் வந்தியத்தேவன்

வந்தியத்தேவனை காப்பற்றும் முயற்ச்சியில் பொன்னியின் செல்வர்

பூங்குழலியின் படகு மூலம் கரைக்கு செல்லும் காட்சி

கதை நடக்கும் இடங்களில் வரைபடம்

பொன்னியின் செல்வன் சித்திரங்கள் - முதல் பாகம்

கல்கியின் மோகினி தீவு சித்திரக்கதை பற்றிய பதிவை படிக்க....

கல்கியின் புதல்வி ஆனந்தி அவர்களின் சித்திரக்கதை பற்றிய பதிவை படிக்க....

பொன்னியின் செல்வன் கார்டூன் பற்றிய நண்பர் லக்கி லிமிடின் பதிவை படிக்க...

குறிப்பு: பொன்னியன் செல்வன் மீதுள்ள பற்றால் ஓவியங்கள் பதிவு இடபட்டுள்ளது. உரிமையாளர் விரும்பினால் நீக்கப்படும்.

கல்கியின் மோகினித்தீவு சித்திரக்கதை(Kalki's Mohini theevu in comics)

2010-01-23T21:40:00.003+05:30

வணக்கம் தோழர்களே,

பொன்னியின் செல்வன் படித்த காமிக்ஸ் ரசிகர்கள் பெரும்பாலானோர்க்கு பொன்னியின் செல்வனை சித்திரக்கதை வடிவத்தில் பார்க்கும் ஆசை இருக்கும். அந்த ஆசை இன்னும் நிறைவேறவில்லையென்றாலும் கல்கியின் வேறு ஒரு படைப்பை சித்திரக்கதை வடிவத்தில் பார்க்கும் ஆசை சிறிது நாட்களுக்கு முன் நிறைவேறியது. அதற்கான நன்றியை வாண்டுமாமா அவர்களுக்கும் பூந்தளிர் நிறுவனதிற்கும் செலுத்தவேண்டும்.

" கதை - ஆனந்தி, படம் - வினு " இந்த கூட்டணி பல சித்திரக்கதைகளை கோகுலம் இதழில் படைத்திருக்கிறார்கள். சிறிது நாட்களுக்கு பிறகு இந்த கதைகள் பூந்தளிர் இதழிலும் வெளிவந்தன. அப்போது பூந்தளிர் இதழானது ஒரு சிறிய இடைவெளிக்கு பின் வாண்டுமாமா அவர்களின் மேற்பார்வையில் வெளிவர தொடங்கி இருந்தது. கல்கியின் நூற்றாண்டு விழா ஆண்டான 1999 ல் கல்கியின் மோகினித்தீவு சித்திரக்கதை வடிவில் வெளியிடப்பட்டிருக்கிறது.

கல்கியின் படைப்புகளில் பொன்னியின் செல்வன் போன்ற நெடுங்கதைகளே மிகவும் பிரபலம். ஆனால் மோகினித்தீவு 100 பக்கங்களுள் அடங்கிவிடக்கூடிய குறுங்கதையாகும். மோகினிதீவு கதை உருவானது பற்றி ஒரு சுவையான தகவலை அவரது மகன் திரு கி ராஜேந்திரன் அவர்கள் மோகினித்தீவின் நாவல் வடிவ புத்தகத்தில் கூறிள்ளார்.

முன்னாள் பிரதமர் நேரு அவர்களின் 60வது ஆண்டு பிறந்தநாள்க்கு ஒரு சிறப்பு மலர் தயாரிக்கப்பட்டது. அதில் தமிழக அரசு சார்பில் வெளியிடப்பட்ட சிறுகதையே மோகினிதீவு ஆகும். இந்த சிறுகதைதான் பின்னாளில் ஒரு குறு நாவலாக மாற்றி கல்கி இதழில் தொடர்கதையாக வெளியிடப்பட்டது. இந்த கதை ஆயுத குறைப்பு பற்றி குறிப்பிடுவதால் நேருவிற்க்கு மிகவும் பிடித்துவிட்டதாம்.

பர்மாவிலிருந்து கப்பலில் வரும் பாஸ்கர கவிராயர் என்பவர் பயனத்தின் இடையே ஒரு மக்கள் வசிக்காத ஒரு தீவினுள் செல்கிறார். பழைய சோழர்கால சிற்ப்பங்களையும் கலை படைப்புகளையும் பார்த்து வியந்துகொண்டிருக்கும் போது அழகே வடிவான ஒரு பெண் மற்றும் ஒரு ஆடவன் அங்கு வருகிறார்கள். அவர்கள் சொல்லும் கதையே மோகினிதீவு. சோழர்கள் காலத்தில் நடந்த பாண்டிய இளவரசிக்கும் சோழ இளவரசனுக்கும் இடையேயான காதல் கதையை அவர்கள் கூறுகிறார்கள். சோழர்களும் பாண்டியர்களும் பகைமை பாராட்டிகொண்டிருந்த நிலையில் அவர்களுடைய காதல் எப்படி நிறைவேரியது என்பதை சுவாரிஸ்யாமாக விளக்குகிறார்கள்.

100 பக்கங்களில் படிப்பதற்க்கு இனிமையாக வழங்கப்பட்டிருக்கும் இந்த கதையை 16 பக்கங்களில் இனிமை குன்றாமல் வழங்குவது என்பது எளிமை அல்ல. இநத முயற்ச்சியில் ஓரளவே வெற்றி பெற்று இருக்கிறார்கள் ஆனந்தி மற்றும் வினு. 16 பக்கம் தான் என்ற கட்டுபாட்டை மீறி இருந்தால் மிகவும் அருமையான ஒரு சித்திரக்கதையை படித்திருக்கலாம் என்பது என் கருத்து. சித்திரக்கதையில் கதை சுருக்கம் படிப்பது போலவே இருக்கிறது. பெரும்பாலான காதல் காட்சிகளை நீக்கிவிட்டே இந்த சித்திரக்கதையை தொகுத்து இருக்கிறார்கள். எனினும் வினுவின் உயிர்ப்பான சித்திரங்களை பார்த்துகொண்டே இருக்கலாம். நீங்கள் மோகினிதீவு நாவல் வடிவத்தை படிக்காமல் இந்த சித்திரக்கதையை படித்தால் சிறப்பான ஒரு கதையாகவே தெரியும்.

கல்கியின் படைப்பை சித்திரக்கதை வடிவில் படிப்பது எனும் எனது ஆசை ஓரளவு நிறவேறியது என்று கூறலாம். எனினும் பொன்னியின் செல்வன் போன்ற கதைகளை சித்திரக்கதை வடிவில் வழங்குவது தமிழ் சித்திரக்கதை உலகை அடுத்த கட்டத்திற்கு எடுத்து செல்லும் என்பது என் எண்ணம்.

பதிவை படித்து விட்டு உங்கள் கருத்துகளை வழங்கிடுங்கள்.

கல்கியின் மோகினித்தீவு நாவலை online ல் படிக்க இங்கே கிளிக்கவும்

அமுத நிலையத்தின் புராண சித்திரக்கதைகள் (Devotional comics by Amutha)

2010-01-08T19:18:00.005+05:30

புராண சித்திரகதைகள் தமிழ் சித்திரக்கதை உலகிற்கு புதியது அல்ல. பைக்கோ நிறுவனத்தின் அம்ர் சித்திர கதா, கதை மலர், சிறுவர்மலரின் தொடர்கதைகள் மற்றும் ஆனந்தியின் சில சித்திரகதைகள் புராண கதைகளை சித்திரகதை வடிவில் வழங்கும் வழக்கத்தை சிறப்பாக செய்திருந்தன. இதில் புகழ் பெற்ற சித்திரகதை ஓவியர்களை பலரின் கைவண்ணத்தை ஒருங்கே பார்க்கும் அனுபவத்தை கதைமலர் கொடுக்கிறது. இந்த வரிசையில் சென்னையின் அமுத நிலையம் சமயகுரவர்களின் வாழ்க்கை வரலாற்றை சித்திரக்கதை வடிவில் வெளியிடத்தொடங்கி இருக்கின்றனர்.
இதன் முதல் புத்தகம் திருஞானசம்பந்தர் பற்றியதாகும். 2003ல் வெளியிடப்பட்ட இப்புத்தகத்தின் அட்டைபடங்களும் இன்ன பிற பக்கங்களின் ஸ்கேன்களும் உங்கள் பார்வைக்கு...

இதில் இரண்டாவது புத்தகமான "திருநாவுகரசர் திவ்ய சரித்திரம்" இதழை இந்த புத்தக கண்காட்சியில் வாங்கினேன்.

சமயகுரவர்களின் வரிசையில் இது இரண்டாவது புத்தகம். முதல் நூல் திருஞானசம்பந்தர் பற்றியது. இந்த "திருநாவுகரசர் திவ்ய சரித்திரம்" நூல் திருவிடைமருதூர் என். இராசேந்திரன் என்பவரின் தனிபட்ட கைவண்ணத்தில் முழு இதழும் உருவாகி உள்ளது.

டின் டின் புத்தகங்களின் size ல் ஒரு தமிழ் காமிக்ஸை பார்ப்பதே குதூகலம் தான் . புத்தகத்தை 125 ரூபாய் என்ற விலையில் வாங்கும் போது சற்று நெருடலாக தான் இருந்தது. ஆனால் இதழை படிக்கும் போது அந்த நெருடல் குறைந்து விடுகிறது.

எனக்கு புராண கதைகளின் மேல் அந்தளவு ஈர்ப்பு இல்லையென்றாலும் சித்திரக்கதை என்பதால் சீக்கரம் படித்து விட்டேன். கதை சுருக்கம் இதுதான்

திருநாவுகரசரின் பெற்றோர்கள் மற்றும் அவரது தமக்கையாருக்கு நிச்சியக்கப்பட்ட மாப்பிள்ளை ஆகியோர் போர் ஒன்றில் மரணமடைந்து விடுகிறார்கள். (சோழர்காலத்து கதை) தனித்து விடப்பட்ட குழந்தைகளில் அக்கா (திலகவதி) சைவ மதத்திலும் தம்பி (திருநாவுகரசர்) சமண மதத்திலும் பற்று கொண்டு வாழ்கின்றனர். தம்பியை சைவ மதத்திற்கு மாற்ற முயலும் திலகவதி அம்மையார் சிவனுடைய உதவியோடு வெற்றி பெறுகிறார். தற்போது முழுமையான சிவபக்தராக இருக்கும் திருநாவுகரசர் மீது சோழ அரசனின் பகைமை பார்வை படுகிறது. இதற்கு அப்புறம் தசாவதாரம் திரைபடத்தில் வரும் காட்சிகள் இந்த கதையிலும் வருகின்றன. (திரைபடத்தில் அரசர் - சைவ மதம், அம்பி - சமண மதம், இந்த கதையில் அப்படியே உல்டா. ஒரே மதத்தினுள் இத்தனை பகைமையா? )

கதையில் வரும் தசாவதார காட்சிகள்...

சிவனுடைய அருளால் சோழ அரசனின் அனைத்து இக்கட்டுகள்லிருந்து மீள்கிறார் திருநாவுகரசர். அதன் பிற்கு நெடிய பயனங்கள் மேற்கொண்டு சைவ மதத்தின் அருமைகளை இனிய தமிழ் பாடல்களாக வழங்குகிறார். கதையின் இறுதியில் ரம்பை ஊர்வசி போன்றோரின் கிலுகிலுப்பான சில காட்சிகளும் இடம் பெறுகிறது. அவர்களின் திருநாவுகரசரை காமத்தில் வீழ்த்தும் முயற்சி படுதோல்வியில் முடிவதோடு கதையும் முடிகிறது.

தேவலோக கன்னிகளின் முயற்சிகள்

இன்னும் சில சிறந்த ஓவியங்கள்

இந்த இதழில் குறிபிடத்தகுந்த விஷயம் திருவிடைமருதூர் என். இராசேந்திரன் அவர்களின் சித்திரங்கள் தான். சித்திரங்கள் அட்டகாசம். அவ்வப்போது தலை காட்டும் பெயிண்டிங் ரக ஓவியங்கள் இன்னும் அருமை. சில இடங்களில் ஓவியர் செல்லம் அவர்களின் சாயல் தெரிகிறது. அமுத நிலயம் வெளியிட்டிருக்கும் மற்றோரு சித்திரக்கதையான திருஞானசம்பந்தர் புத்தக கண்காட்சியில் கிடைக்கவில்லை. நேரடியாக பதிப்பகத்தில் கிடைக்க கூடும்.

நண்பர்கள் பதிவை படித்துவிட்டு கருத்துகளை பகிர்ந்து கொள்ளுங்களேன்...

Prodigy comix - அப்துல் கலாம்

2010-01-02T23:46:00.006+05:30

அனைவருக்கும் புத்தாண்டு வாழ்த்துக்கள் நண்பர்களே..

இந்த வருட புத்தக கண்காட்சியில் ஒரு காமிக்ஸ் புத்தகமாவது வாங்கி விட வேண்டும் என சென்ற நான் "அப்துல் கலாம்" என்ற அற்புதமான காமிக்ஸ் ஒன்றை கையகபடுத்தினேன். கிழக்கு பதிப்பகத்தின் P-32 ஸ்டாலில் 'Prodigy comix' என்ற புத்தக வரிசையில் அப்துல் கலாம் அவர்கள் பற்றிய இந்த காமிக்ஸ் புத்தகம் கிடைக்கிறது.

S. சுஜாதா என்பவரின் எழுத்திலும் K. சொக்கலிங்கம் என்பவரின் ஓவியத்திலும் சிறப்பான காமிக்ஸ் புத்தகமாக தயாரிக்கப்பட்டு இருக்கிறது. தொழில்நுட்ப வசதிகளை நன்றாக பயன்படுத்தி இருப்பார்கள் போலும். கதை, ஓவியத்திற்கு அடுத்தபடியாக வண்ணம்(colors) என்ற இடத்தில் தனிமனிதரின் பெயர் ஏதும் இல்லாமல் அனிமேஷன் நிறுவனம் ஒன்றின் பெயர் உள்ளது. நல்ல முன்னேற்றம் தான்.

கிழக்கு பதிப்பகம் website மூலமாக ஏற்கனவே இந்த புத்தகம் பற்றி கேள்விபட்டிருந்ததால் கிழக்கு பதிப்பகத்தின் ஸ்டாலில் விசாரித்த போது காமிக்ஸ் புத்தகமெல்லாம் இங்கு விற்பதில்லை என்று கூறி விட்டார்கள். அப்புறம் சிறிது நேர தேடுதல்க்குப்பின் புத்தகம் கண்ணில் பட்டது. இதே வடிவில் ஆங்கிலத்திலும் கிடைக்கிறது.

கதை, மொழிநடை, ஓவியம், வண்ணம் மற்றும் அச்சு என அனைத்தையும் சிறப்பாக செய்திருக்கிறார்கள். வாழ்க்கை வரலாறு என்றாலும் சிறிது கூட அலுப்பில்லாமல் பக்கங்களை திருப்பமுடிகிறது. ஏற்கனவே அக்னிச் சிறகுகள் படித்திருந்தாலும் பல விஷயங்கள் புதிதாக (அல்லது புதிய கோணத்தில்) தெரிந்துகொள்ள முடிகிறது. அப்துல் கலாமின் வழ்க்கையில் அவர் சந்தித்த தோல்விகள் பற்றிய தகவல்கள், 'தோல்வியே வெற்றியின் முதல் படி' என்ற வரிகளுக்கு அப்துல் கலாம் சிறந்த உதாரணம் என காட்டுகிறது. அவரின் முதல் ஏவுகலம் (S.L.V) விண்ணில் செலுத்தப்பட்ட சிறிது நேரத்திற்கெல்லாம் வெடித்து சிதறுகிற காட்சி இந்த புத்தகத்தில் சிறப்பாக சொல்லப்பட்டிருக்கிறது.

அப்துல் கலாமின் M.I.T நாட்கள்

நந்தி எனும் தோல்வி முயற்சி

காமிக்ஸ் வடிவில் ஒரு அற்புத தலைவரின் வாழ்க்கை வரலாற்றை கொடுத்து தமிழ் காமிக்ஸ் உலகை பெருமையடைய செய்திருக்கும் கிழக்கு பதிப்பதிற்கு காமிக்ஸ் ரசிகன் என்ற முறையில் நன்றிகள். இந்த முயற்ச்சியின் அடுத்த கட்டதை பார்க்க ஆர்வமாக உள்ளேன். தமிழில் பெரியவர்களும் படித்திடும் தரமான காமிக்ஸ்கள் கிழக்கு பதிப்பகம் மூலமா வந்திட வேண்டும்.

இதே ஸ்டாலில் மேலும் சில தமிழ் காமிக்ஸ்கள் கிடைக்கிறது. ஆனால் அவை மிகவும் சிறிய குழந்தைகளுக்கானவை என்பதால் நான் வாங்கவில்லை. குழந்தைகளுக்கு புத்தகம் வாங்க விரும்புவோர்க்கு பயன்படும்.

Prodigy comix - அப்துல் கலாம் இணையத்தில் வாங்க இங்கே சொடுக்கவும்

--------------------------------------------------------------------------------------------------------------------

சென்னை புத்தக கண்காட்சியில் வாங்க கூடிய இதர காமிக்ஸ் புத்தகங்கள் (என்க்கு தெரிந்த வரை)

மணிமேகலை பதிப்பகம்
அப்புசாமியின் கலர் டிவி
தாராவும் குகை மனிதர்களும்

நியு சென்சுவரி புக்
ரஷ்ய புரட்சி

கிழக்கு பதிப்பகம்
'Prodigy comix' - அப்துல் கலாம்
மேலும் சிறிய குழந்தைகளுக்கான சில காமிக்ஸ் வடிவ கதைகள்

விகடன் பதிப்பகம்
நடுகடல் நாசகாரன்
மரணம் துரத்தும் மஞ்சு
வேற்றுக்கிரக விரோதிகள்

(இவை சுட்டி விகடனில் இனைப்பாக வெளிவந்த சுட்டி காமிக்ஸின் பதிப்பக வடிவம்)

சென்ற ஆண்டு போலவே Info Mapல் லயன் காமிக்ஸ் கிடைக்கிறது

பதிவினை படித்து விட்டு உங்கள் கருத்துகளை தெரிவிக்க மறந்து விடாதீர்கள் நண்பர்களே....

தாராவும் குகை மனிதர்களும்

2009-12-19T15:00:00.004+05:30

வணக்கம் நண்பர்களே,
2009ல் பதிப்பகங்கள் மூலம் வெளியிடப்படும் சித்திரக்கதை இதழ்களில் இராஜகம்பீரம் இல்லாமல் வெளியிடப்பட்டிருக்கும் மற்றுமொரு சித்திரக்கதை "தாராவும் குகை மனிதர்களும்". சமீபத்தில் வாங்கிய இந்த புத்தகத்தை பற்றி இந்த பதிவில் பார்ப்போம்.

மணிமேகலை பிரசுரம் வெளியிட்டுள்ள இந்த இதழின் ஆசிரியர் இராஜதிலகம் ஆவார். அயல்நாட்டு கதை வரிசை ஒன்றை மொழிபெயர்த்து கொடுத்திருப்பதாகவே தெரிகிறது. தாரா என்ற செவிந்திய வீரன் தான் கதையின் நாயகன். செவிந்திய வீரன் என்றவுடன் நமது கெளபாய் கதைகளை நினைத்துகொள்ள வேண்டாம். பல ஆயிரம் ஆண்டுகளுக்கு முன்பு டைனோசர்கள் காலத்து செவிந்திய வீரன் தான் இந்த தாரா. (டைனோசர்கள் காலத்தில் மனிதர்கள்??)

கதை என்னவென்று பார்ப்போமா?

செவிந்திய வீரன் தாராவிற்கு நாகரித்தில் இன்னும் பின்தங்கிய குகைவாழ் மனிதர்களின் நட்பு கிடைக்கிறது. தாரா அவர்களுக்கு படகு ஓட்டுவது நெருப்பை பயன்படுத்துவது என புதிய விஷயங்கள் பல கற்றுகொடுத்து உதவி செய்கிறான். அவர்களுக்கு புதிய வாழ்விடத்தை தேடி கொடுக்கிறான். இந்த செயல்களை செய்யும் போது அவனுக்கு நேரிடும் இன்னல்கள் தான் கதை. அப்படியென்ன இன்னல்கள்?? வேறு ஒன்றும் இல்லை. 2 பக்கத்திற்கு ஒருமுறை எதாவது கொடிய விலங்கு தாராவையும் அவன் உடன் இருக்கும் நண்பன் அந்தாரையும் தாக்க வருகிறது. அதையெல்லாம் விதவிதமாக அம்பு விட்டு கொல்கிறார்கள். இப்படியாக கதை போகிறது. இந்த புத்தகத்தில் இரண்டு கதைகள் தொகுக்கப்பட்டிருகிறது.

1. தாராவும் குகை மனிதர்களும்

2. நெருப்பு உண்டக்குவோரின் யுத்தம்

அட்டைபடம் பாத்தவுடன் மனசில் ஒட்டிகொள்கிறது. மொழி நடை இன்னும் சிறப்பாக செய்திருக்கலாம். கதை அப்படி ஒன்றும் சுவாரிஸ்யாமாக இல்லையென்றாலும் சித்திரங்கள் கலக்கலாக இருக்கிறது. விதவிதமான விலங்குகளை தரமான சித்திரங்களில் பார்ப்பது நல்ல அனுபவமாக இருக்கிறது.கதையில் வரும் விதவிதமான விலங்குகள் குழந்தைகளை கவரும். நூலாசிரியர் விலங்குகள் ஆரய்ச்சியாளர் என்பதினால் இப்படி ஒரு கதையை தேர்ந்தெடுத்திருக்கலாம் எனபது என் யூகம். எப்படியிருந்தாலும் தமிழில் சித்திரக்கதை வெளியிட்டிருக்கும் இராஜதிலகம் அவர்களுக்கு நன்றிகள்.

ஆசிரியர் குறிப்பில் இவரது சித்திரக்கதைகள் தொடர்ந்து மணிமேகலை பிரசுரத்தில் வெளிவரும் என குறிப்பிட்டு இருக்கிறார்கள். இனி வரும் இதழ்களில் கதையிலும் மொழிபெயர்ப்பிலும் இன்னும் சற்று கவனம் செலுத்த வேண்டும் என்பது என் விருப்பம்.

கதை முடிவில் சம்பந்தமே இல்லாமல் மாயாஜால காமிக்ஸ் என குறிப்பிடுகிறார்கள். அது என்னவென்று தெரியவில்லை.

பதிப்பகம் - மணிமேகலை பிரசுரம்

ஆசிரியர் - இராஜதிலகம்

விலை - ரு. 50

பக்கங்கள் - 72

புத்த்கம் வாங்க - 04424342926, 04424346082

சித்திரக்கதையில் அப்புசாமி (Appusami in comics)

2009-12-10T22:21:00.004+05:30

வணக்கம் நண்பர்களே, தமிழ் இலக்கிய உலகில் சற்று பின்தங்கிய நிலையில் இருப்பது நகைச்சுவை இலக்கியம் தான் என்பது என் கருத்து. (அடுத்ததாக குழந்தைகள் இலக்கியம்) அரிதான நகைச்சுவை கதைகளில் மிகவும் முக்கியமான கதை வரிசை அப்புசாமி - சீதாப்பாட்டி கதை வரிசையாகும். குமுததின் முக்கிய இலக்கியவாதியான பாக்கியம் ராமசாமியால் படைக்கப்பட்ட இப்பாத்திரங்கள் இன்றளவும் தமிழக மக்களால் ரசிக்கப்படுகிறார்கள்.

பெரும்பாலும் சிறுகதை / நாவல் வடிவத்திலேயே எழுதப்பட்ட இக்கதைவரிசை அவப்போது சித்திரக்கதை வடிவிலும் வந்துள்ளது. அதில் என் கைக்கு சிக்கிய ஒரு புத்தகத்தை பற்றி இந்த பதிவில் பார்ப்போம்

1993 யில் (1997இல் மறுபதிப்பு) மணிமேகலை பிரசுரம் வெளியிட்டுள்ள 52 பக்கங்கள் கொண்ட "அப்புசாமியின் கலர் டி.வி" சித்திரக்கதை புத்தகத்தின் அட்டைபடம் உங்கள் பார்வைக்கு.

இந்த இதழுக்கு சித்திரங்கள் வரைந்திருப்பது ஓவியர் ஜெயராஜ் ஆகும். இதுவரை வெளிவந்துள்ள அனைத்து அப்புசாமியின் கதைகளுக்கும் சித்திரம் வரந்திருப்பது இவரே. புத்தகதிற்கு லேனா தமிழ்வாணன் எழுதிய முன்னுரையும் இதழின் சில பக்கங்களும் உங்கள் பார்வைக்கு.

கதையில் எம்.ஜி.ஆர் தோற்றம்

அப்புசாமி கலர் டி.வி க்கு ஆசைப்பட்டு அதனால் சீதாப்பாட்டிக்கு வந்திடும் தொல்லைகள் பற்றியே கதை. நகைச்சுவைக்கு சிறிதும் பஞ்சம் இல்லாது கதை போகிறது. நிறைய இடங்களில் வாய்விட்டு சிரிக்கலாம். சித்திரக்கதையானாலும் பெரியவர்களையும் கவரும் விதமாகவே கதை பின்னப்பட்டுள்ளது. புத்தக வடிவமைப்பை பார்க்கும் போது இந்த கதை ஏற்கனவே வார இதழ் ஏதோ ஒன்றில் வந்த கதை போல் இருக்கிறது. குமுதமாக இருக்க கூடும். ஓவியர் ஜெயராஜ் கவர்ச்சியாக படம் வரைவதில் புகழ்பெற்றவர். அவரின் ரசிகர்களுக்காக ஒரு படம்.

இந்த இதழை பொறுத்த வரை மகிழ்ச்சியான மற்றும் சோகமான செய்தி என்னவென்றால் இன்னும் இப்புத்தகம் பதிப்பகத்தாரிடம் ஸ்டாக் இருப்பதே. இன்றும் இப்புத்தகதை வாங்கலாம் என்பது மகிழ்ச்சியான விஷயம் என்றாலும் ஒரு சித்திரக்கதை இதழ் 12 வருடங்களாக விற்பனையாகாமல் இருப்பது ஆரோக்யமான செய்தி அல்ல.....

- - - இதழின் விலை ரூ.10 மட்டுமே. இதழை வாங்க 044 - 24342926 க்கு தொடர்பு கொள்ளவும் - --

(இந்த இதழுடன் வேறு சில சித்திரக்கதை புத்தகங்களையும் மணிமேகலை பிரசுரத்தில் வாங்கி உள்ளேன். அவற்றை பின் வரும் பதிவுகளில் எழுதலாம் என்று உள்ளேன்)

எழுத்தாளர் பாக்கியம் ராமசாமி

அப்புசாமி - சீதா பாட்டி

------------------------------------------------------------------------------------------------------------------------------------------------------------------------------------------------------------

பிற்சேற்கை 1 - ஓவியர் ஜெயராஜ் அவர்கள் அப்புசாமி - சீதாப்பாட்டி கதை வரிசைக்கு ஓவியம் வரைந்ததை மிகவும் பெருமையாக் குறிப்பிடுகிறார். ஓவியர் ஜெயராஜ் அவர்கள் பற்றி தினமலர்-வாரமலர் இதழில் தொடர் கட்டுரை வந்தது. அதில் சீதாப்பாட்டி, அப்புசாமி பற்றி அவர் கொடுத்துள்ள செய்தி மற்றும் பேட்டி.

கேள்வி : சீதாப்பாட்டி, அப்புசாமி தாத்தா என்ற மறக்க முடியாத உருவங்களை, நீங்கள் உருவாக்கியிருக்கிறீர்கள். அவர்கள் உருவான கதை பற்றி?

பிரபல எழுத்தாளரும், குமுதத்தின் முன்னாள் உதவி ஆசிரியருமான ஜ.ரா.சுந்தரேசன், காலத்தால் அழியாத, மறக்க முடியாத இரு பாத்திரங்களை உருவாக்கியிருக்கிறார்.

ஓவியர் ஜெயராஜ்
அப்புசாமியை வைத்து முதல் கதை எழுதியபோது, என்னிடம், "நல்ல பழுத்த கிழம், நல்ல புத்தி உள்ள ஒரு கேரக்டரை வைத்து கதை எழுதப் போகிறேன்...' என்றார். கொஞ்சம் யோசித்து தாத்தா உருவத்தை வரைந்தேன். சுந்தரேசன் சாருக்கு ரொம்ப பிடித்து போய்விட்டது. உடனே அந்த டிராயிங்கை ஆசிரியர் எஸ்.ஏ.பி.,யிடம் காண்பித்தார்.

அவரும், "ரொம்ப பொருத்தமாக இருக்கு. அப்படியே போடுங்க...' என்று உற்சாகப்படுத்தினார். தொடர்ந்து ஜ.ரா., சொல்லாமலே நானே, அந்த தாத்தாவிற்கு ஒரு ஜோடியாக, வயதான பாட்டியின் படம் வரைந்தேன். அதுவும் அவர்களுக்குப் பிடித்துப் போயிற்று.

அப்புசாமி தாத்தாவின் முகத்தையே, சீதாப்பாட்டிக்கும் போட்டேன். அதற்கு மேலே தலைமுடி, மூக்குக் கண்ணாடி, குங்குமம் என்று சில எக்ஸ்ட்ரா விஷயங்களை வரைந்தேன். வாசகர்களுக்கும் இரு உருவ அமைப்புகளும் மிகவும் பிடித்து விட்டன. கிளாமராக நான் வரைந்த இளம் பெண்களின் படங்களை விட, எனக்கு அதிகமான அங்கீகாரம், புகழ்பெற்றுக் கொடுத்தது, அப்புசாமி - சீதாப்பாட்டி என்பது தான் மறுக்க முடியாத உண்மை. தமிழ்ப் பத்திரிகை உலகில், சாகாவரம் பெற்ற இரு பாத்திரங்கள். அவர்கள் ஏற்கனவே நல்ல வயதானவர்கள் என்பதால், அவர்களுக்கு இனி வயதாகாது. இவர்களின் உருவங்களைத் தான், நான் என் விசிட்டிங் கார்டில், ஒரு ஓவியன் என்று சட்டென்று விளங்க, உபயோகப்படுத்துகிறேன்.

சிறுகதை, தொடர்கதை, சித்திரக்கதை என்ற மூன்று வடிவங்களிலும் வந்திருக்கும் ஒரே கதை (நான் அறிந்தவரை) சீதாப்பாட்டி - அப்புசாமி கதை. குமுதம் முன்னாள் உதவி ஆசிரியர் ஜ.ரா.சுந்தரேசன், பாக்கியம் ராமஸ்வாமி (அவரது பெற்றோர் பெயரில்) என்ற பெயரில் எழுதிய அந்தக் கதைக்கு, ஆரம்பம் முதலே படம் வரையும் வாய்ப்பு எனக்கு கிடைத்தது.

பல ஆண்டுகள் குமுதத்திலும், பிறகு விகடன், குங்குமம், கல்கி என்று பல பத்திரிகைகளிலும் அப்புசாமி கதைகள் வந்தன. எந்த பத்திரிகையில் அப்புசாமியின் கதை வந்தாலும், அதற்கு படம் போடும் வாய்ப்பை, தொடர்ந்து எனக்கே கொடுத்தனர். இதுவும் ஒரு வகை சாதனை தான்!

பிற்சேற்கை 2 - அப்புசாமி காமிக்ஸ் பற்றி ஏற்கனவே லக்கிலூக் வலைதளத்தில் விவாதம் நடந்துள்ளது. இங்கு ஒரு அப்புசாமி - சீதாப்பாட்டி சித்திர சிறுகதையும் நீங்கள் படிக்கலாம். அதற்க்கான தொடர்பு

கிழக்கு பதிப்பகத்தினர் அப்புசாமியின் கதைகளை சித்திரக்கதைகளாக வெளியிட போவதாக கூறி இருந்தனர். அதற்க்கான தொடர்பு

---------------------------------------------------------------------------------------------------------------------------------------------

பதிவினை படித்துவிட்டு உங்கள் கருத்தை கூறிவிடுங்கள்

இன்ஸ்பெக்டர் கருடா (Inspector eagle)

2009-11-21T21:50:00.012+05:30

வணக்கம் நண்பர்களே,

ஐந்து தமிழ் காமிக்ஸ் பத்திரிக்கைகளில் இடம்பெற்ற ஒரு இந்திய படைப்பு பற்றி இந்த பதிவு

தமிழ் காமிக்ஸ் உலகில் அனைத்து வகைகளிலும் சூப்பர் ஸ்டாராக திகழ்வது லயன் - முத்து காமிக்ஸ். இந்தியாவின் எந்த மொழியிலும் இல்லாத அளவு விதவிதமான கதைகளை அறிமுகபடுத்திய பெருமை லயன் - முத்து காமிக்ஸ்க்கு உண்டு. ஆங்கிலத்தில் வெளிவராத சில அயல் நாட்டு கதைகளை கூட தமிழ் மொழி வாசகர்களுக்கு கொடுத்திருக்கிறார்கள். அத்தகைய லயன் - முத்துவில் இந்திய படைப்புகள் இடம் பெறுவது என்பது மிக அறிது. இந்த 'எப்பொழுதாவது வரும்' இந்திய கதைகளில் குறிப்பிட தகுந்த கதை வரிசை இன்ஸ்பெக்டர் கருடா (அல்லது இன்ஸ்பெக்டர் ஈகிள்). கபீஷ், அதிமேதை அப்பு போன்ற படைப்புகளும் லயன்/முத்து வில் இடம்பெறும் இந்திய கதைகளில் குறிப்பிடதக்கவை.

இன்ஸ்பெக்டர் கருடாவின் சித்திரகதைகள் லயன் காமிக்ஸ், முத்து காமிக்ஸ், ராணி காமிக்ஸ், பூந்தளிர், பார்வதி சித்திரக்கதைகள் மற்றும் விமல் காமிக்ஸ் ஆகிய இதழ்களில் வெளிவந்துள்ளது.

பெரும்பாலும் 20 பக்கங்களில் அடக்கிவிடகூடிய கதைகளே நமது காமிக்ஸ்களில் இடம்பெற்றுள்ளது.
அனைத்து கருடாவின் கதைகளும் " ஒரு குற்றம் - கருடா மற்றும் பல்பீரின் விசாரணை - கொலையாளி பற்றிய குழப்பம் - கருடாவின் துப்பறியும் திறன் மூலம் கொலையாளி சிக்குதல் - சிறிய ஆக் ஷன் - முடிவு " என ஒரே ஃபார்முலாவில் இருப்பதாகவே எனக்கு படுகிறது. ஆனால் அனைத்து கதைகளும் சுவாரஸ்யமாகவே இருக்கிறது.

என்னுடைய கணிப்பு படி லயன்/முத்து இதழ்களில் மொத்தமாக 10 இன்ஸ்பெக்டர் கருடாவின் சித்திரகதைகள் இடம்பெற்றிருக்கலாம். அவற்றில் சில கதைகளின் முதல் பக்கம் உங்கள் பார்வைக்கு...

பாங்க் கொள்ளை - லயன் காமிக்ஸ் வெளியீட்டு எண் - 72 (மீண்டும் ஸ்பைடர்)

காணாமல் போன சிப்பாய் - முத்து காமிக்ஸ் வெளியீட்டு எண் - 172 (சைத்தான் சிறுவர்கள்)
(இங்கு இவரது பெயர் இன்ஸ்பெக்டர் ஈகிள், பல்பீரின் பெயர் - ஹவில்தார் நாயக்)

விபரீத விருந்து - முத்து காமிக்ஸ் வெளியீட்டு எண் - 278 (மரண மண்)

இவற்றில் விபரீத விருந்து தமிழில் கடைசியாக வெளிவந்த இன்ஸ்பெக்டர் கருடாவின் சித்திரகதையாகும்.

இது தவிர ராணி காமிக்ஸில் வெளிவந்த இன்ஸ்பெக்டர் கருடாவின் சித்திரகதையின் முதல் பக்கம்
(புத்தாண்டு விருந்து - ராணி காமிக்ஸ் வெளியீட்டு எண் - 86**)
(இங்கு இவரது பெயர் இன்ஸ்பெக்டர் சம்பத், பல்பீர் செவன் நாட் திரீ என அழைக்கப்படுகிறார்)

இது தவிர விமல் காமிக்ஸ் எனும் காமிக்ஸ் இதழிலும் இவர் கதையை பார்க்க முடிகிறது. அட்டைபடத்தில்*** கருடா இடம்பெற்றிருப்பதும் இருவண்ணத்தில் தாயாரிக்கப்பட்டிருப்பதும் இவிதழின் சிறப்புகள்.

நான்காவதாக பார்வதி சித்திரக்கதையிலும் தலை காட்டி உள்ளார் கருடா. இங்கு இவரது பெயர் இன்ஸ்பெக்டர் இந்த்ரஜித் ஆகும்.

இன்ஸ்பெக்டர் கருடாவின் படைப்பாளிகள் பற்றிய தெளிவான விபரங்கள் கிடைக்காத நிலையில் நண்பர் ரஃபிக் கொடுத்துள்ள தகவல்கள்படி கதை - ஜகஜிட் உப்பால்(Jagjit Uppal) ஓவியங்கள் - பிரதீப் சட்டே (Pradeep Sathe). வெளிவந்த பத்திரிக்கை Sapthaik Hindustan & Satyakatha *

லயன்/முத்து ஆசிரியர் விஜயன் அவர்கள் இன்ஸ்பெக்டர் கருடாவை பக்க நிரப்பியாகவே உபயோகித்து வந்துள்ளார் என்பது என் என்ணம். ஆனால் 8~9 வருடங்களுக்கு முன் முத்து காமிக்ஸில்(வெ.எண் - 171) வந்திட்ட முத்து மினி காமிக்ஸ் விளம்பரம் இன்ஸ்பெக்டர் கருடாவின் சித்திரகதைகளுக்கு முக்கியத்துவம் கொடுப்பதாக இருந்தது. ஆனால் அந்த முயற்சி விளம்பரத்தோடு நின்று விட்டது தான் பரிதாபம்.

--- நன்றி ---

Update at 13/03/10 : மேற்கண்ட இதழ்கள் அல்லாமல் பார்வதி சித்திரக்கதை மற்றும் பூந்தளிரிலும் தலை காட்டி உள்ளார் கருடா. இங்கு இவரது பெயர் இன்ஸ்பெக்டர் இந்த்ரஜித் ஆகும். பூந்தளிரில் வெளியான கருடா சாகஸம். (விரைவில் பார்வதி சித்திரக்கதை ஸ்கேனும் இடம்பெறும்)

* தகவல்கள் உபயம் - ரஃபிக்
** அட்டைபடம் உபயம் - டாக்டரின் அ.கொ.தீ.க வலைதளம்
*** scan உபயம் - R T முருகன்